TT Ads

අපේ සමාජයේ බැංකු ණයක් නොගත් කෙනෙක් නැති තරම්ය. බොහෝ දෙනෙක් තම පෞද්ගලික මූල්‍ය අවශ්‍යතාවන් සඳහා බැංකුවකින් හෝ මූල්‍ය ආයතනයකින් ණය ලබා ගැනීම සිදු කරනු ලබයි.

ණය ලබා දීමට පෙර බැංකු හෝ මූල්‍ය ආයතන හැකි සෑම උත්සාහයක්ම දරනු ලබන්නේ ණය ලබාගන්නාගේ අභිමතාර්ථයන් පරිපූර්ණය කිරීමටයි. එලෙස බැංකුවකින් හෝ මූල්‍ය ආයතනයකින් ණය හෝ වෙනත් පහසුකම් ප්‍රදානය කිරීමේදී අවදානමක් දැරීමට එම ආයතනයට සිදුවේ. මෙම අවදානම යනු කුමන හේතුවන් නිසා හෝ ණය ගැනුම්කරු විසින් ණය ගෙවීම පැහැර හැරීම හෝ වෙනත් හේතුවක් නිසා එම ආයතනයට ණය අයකර ගැනීමට නොහැකි වීමයි. මෙම අවදානම අවම කර ගැනීමට බැංකු හෝ මූල්‍ය ආයතන සෑම විටම උත්සාහ දරයි. එබැවින් ණය ලබාදුන් පසු නැවත එම ණය අයකර ගැනීමට හැකියාව තිබේද යන්න පිළිබඳව ඔවුන් පළමුවෙන් සොයා බලයි. එසේම ප්‍රදානය කරන ණය මුදල් වෙනුවෙන් සුරැකුම් ලබා ගැනීමට ණය දෙනු ලබන ආයතන පෙළඹී ඇත.

එලෙස බැංකුවකින් හෝ යම් මූල්‍ය ආයතනයකින් යම් තැනැත්තෙකු විසින් දේපළ ණයක් ලබා ගැනීමේදී සුරැකුමක් ලෙස යම් නිශ්චල හෝ චංචල දේපළක් ඇපයට හෝ උකසට තැබීමට සිදුවේ. එසේ නොමැති නම් ඇපකරුවන් ඉදිරිපත් කිරීමට ණය ගැනුම්කරුවන්ට සිදුවේ.

බැංකුවකින් හෝ මූල්‍ය ආයතනයකින් ණය හෝ වෙනත් පහසුකම් ප්‍රදානය කිරීමට පෙර පාර්ශ්වකරුවන්ගේ ණය හා බැඳීම් පිළිබඳ තොරතුරු ලබා ගැනීමට ආයතනය කටයුතු කරයි. මෙම තොරතුරු වර්ෂ 1990 අංක 18 දරන ශ්‍රී ලංකා ණය තොරතුරු කාර්යාංශ පනත යටතේ පිහිටුවා ඇති ණය තොරතුරු කාර්යාංශය (CRIB – Credit Information Bureau) මගින් ලබා ගැනීම බැංකු හෝ මූල්‍ය ආයතන සිදු කරනු ලබයි.

සාමාන්‍යයෙන් සියලු‍ම බැංකු හෝ මූල්‍ය ආයතන විසින් තම ණය ගනුදෙනු පිළිබඳ සියලු‍ තොරතුරු ණය තොරතුරු කාර්යාංශය වෙත වාර්තා කෙරේ. එකී ණය ලබාදීමේදී ණය මුදලේ ප්‍රමාණය, සුරැකුම පිළිබඳව, ණය මුදලේ ස්වභාවය ආදී කරුණු, ණය මුදලට අදාළ වාරික ගෙවීම සම්බන්ධ විස්තර සාමාන්‍යයෙන් මෙලෙස වාර්තා කිරීම සිදුවේ. යම් පුද්ගලයෙක් නියමිත ණය වාරික ගෙවීම පැහැර හැරියොත් ඒ සම්බන්ධයෙන් ද ණය තොරතුරු කාර්යාංශයට දැනුම් දීමට බැංකු හෝ මූල්‍ය ආයතන විසින් පියවර ගත යුතුවේ.

එසේම යම් බැංකුවකින් හෝ මූල්‍ය ආයතනයකින් ලබාගත් ණය මුදලක් ප්‍රධාන ණයකරු විසින් ගෙවීම පැහැර හැර ඇති විටෙක ඒ පිළිබඳව මෙන්ම, ඔහුගේ ඇපකරු ලෙස ඇප බැඳුම්කරයට අත්සන් කර ඇති තැනැත්තන් කවුරුන්ද යන්නද, ඒ සම්බන්ධයෙන් නීතිමය කටයුතු ආරම්භ කර ඇත්තේද යන්නද ණය තොරතුරු කාර්යාංශයට දැනුම් දීමට බැංකු හෝ මූල්‍ය ආයතන විසින් පියවර ගත යුතුවේ.
මෙම ණය තොරතුරු කාර්යාංශය (CRIB – Credit Information Bureau) මගින් ණය තොරතුරු රැස් කිරීම හා ඒවා බැංකු හෝ මූල්‍ය ආයතන වෙත ලබා දීමේ හේතුවෙන් ගනුදෙනුකරුවන් වෙනුවෙන් අනාගත ණය පහසුකම් ලබා දෙන ආයතනයට විශාල ආරක්ෂාවක් මෙම කාර්යාංශය මගින් ලබා දෙනු ලබයි.

යම් පුද්ගලයකුගේ ජාතික හැඳුනුම්පත් අංකය හෝ නම අනුව එක් එක් තැනැත්තාගේ ණය සම්බන්ධ තොරතුරු එම ආයතනයෙන් විමසිය හැකි අතර ණය තොරතුරු කාර්යාංශයෙන් ලබා දෙන වාර්තාව අනුව එම පුද්ගලයා විසින් ලබාගෙන ඇති ණය පිළිබඳව මෙන්ම, ඔහු/හෝ ඇය ඇපකරුවන් වශයෙන් ඉදිරිපත්වී ඇති සියලු‍ ණය පිළිබඳව ද අනාවරණය කර ගත හැක. එසේම ණය නිසි පරිදි ගෙවන්නේ නම් කොළ පැහැයෙන්ද, දින 1 – 90ත් අතර කාලය තුළ ණය නොගෙවා ඇත්නම් කහ පැහැයෙන්ද, දින 90ට වඩා ණය නොගෙවා ඇත්නම් රතු පැහැයෙන්ද දක්වන අතර, ඒ අනුව එක් එක් පුද්ගලයාගේ තත්ත්වය පිළිබඳ පැහැදිලිව අනාවරණය කර ගත හැක.

මේ අනුව ණය ලබාගත් තැනැත්තා ණය මුදල ගෙවීම පැහැර හරින්නේ නම් ඒ බව ණය තොරතුරු කාර්යාංශයේ ලේඛන වල දැක්වෙන බැවින් එකී ණය ගැනුම්කරුට ‍හෝ එම ණය වෙනුවෙන් ඇපකරුවන් ලෙස ඉදිරිපත් වී ඇති පුද්ගලයන්ට වෙනත් බැංකුවකින් හෝ මූල්‍ය ආයතනයකින් ණය මුදලක් ලබා ගැනීමට නොහැකි තත්ත්වයක් උද්ගත විය හැක. ඇපකරුට එසේ ණය ලබා ගැනීමට හැකි වන්නේ ප්‍රධාන ණයකරු විසින් ලබා ගන්නා ලද ණය මුදල නියමිත පරිදි වාරික හිඟ නොතබා ගෙවීම සිදු කිරීමෙන් පසු සහ/හෝ එම ණය මුදල නියමිත පරිදි ගෙවා අවසන් කිරීමෙන් පසුවය.

බැංකුවකින් හෝ මූල්‍ය ආයතනයකින් ණය හෝ වෙනත් ණය පහසුකම් ලබා ගැනීමේදී ඇපකරුවන් ලෙස ඉදිරිපත් වන පුද්ගලයන්ට එකී ණය ගෙවීමට ඇති හැකියාව බැංකුව විසින් සොයා බලන අතර බැංකුවෙන් ඉල්ලා සිටින අපේක්ෂාවන් සපුරාලයි නම් පමණක් එම පුද්ගලයන් ඇපකරුවන් ලෙස බැංකුව විසින් පිළි ගනු ලබයි.

පෞද්ගලික මිත්‍රත්වයන් මත ප්‍රධාන ණයකරුගේ ඇපකරුවන් ලෙස බොහෝදෙනෙක් ඉදිරිපත් වුවද ඒ අතරින් වැඩි පිරිසකට ඇපකරුවන් වශයෙන් ඉදිරිපත් වීමේදී තමන් එමගින් කිනම් වගකීමකට බැඳේද යන්න පිළිබඳව නිසි අවබෝධයක් නොමැති බව පෙනීයයි. එබැවින් බැංකුවකින් හෝ යම් මූල්‍ය ආයතනයකින් යම් පුද්ගලයෙකු පුද්ගලික ණයක් ලබා ගැනීමේදී එම ආයතනය විසින් ඉල්ලා සිටින ඇපකරුවන් සම්බන්ධයෙන් මෙහිදී සාකච්ඡා කිරීම කාලෝචිත යැයි හැඟේ.

බැංකුවකින් හෝ යම් මූල්‍ය ආයතනයකින් යම් පුද්ගලයෙකු පුද්ගලික ණයක් ලබා ගැනීමේදී ඔහුගේ ඇපකරු වශයෙන් ඉදිරිපත් වන තැනැත්තා විසින් බැංකුව සමඟ ඇප බැඳුම්කරයකට එළඹිය යුතු වේ. එනම් ණය මුදල ලබා ගනු ලබන ප්‍රධාන ණයකරු විසින් ණය මුදල ගෙවීම පැහැර හරිනු ලැබුවහොත් එම මුදල එම ඇපකරු විසින් ගෙවීමට බැඳී සිටින බවට කොන්දේසි ඇතුළත් ඇප බැඳුම්කරයකට ඇපකරු විසින් අත්සන් තැබිය යුතු වේ.

එම නිසා ඇපකරුවෙක් වශයෙන් ඉදිරිපත් වීමේදී එම ණය මුදල ගන්නා තැනැත්තාට ණය ගෙවීමට හැකියාවක් ඇති බවට සනාථ වන්නේ නම් පමණක් එවැනි අය වෙනුවෙන් ඇපකරුවන් ලෙස අත්සන් කිරීමෙන් කිසිදු අයෙකුට ගැටලුවක් ඇති වන්නේ නැත.
යම් බැංකුවකින් හෝ මූල්‍ය ආයතනයකින් ණය ලබා ගත් තැනැත්තෙකු එකී ණය මුදල ගෙවීම දිගින් දිගටම පැහැර හරින්නේ නම් එකී ණය මුදල අය කර ගැනීම සඳහා ප්‍රධාන ණයකරුට විරුද්ධව මෙන්ම එම ණය මුදල ලබා දීමේදී ප්‍රධාන ණයකරුගේ ඇපකරුවන් ලෙස අත්සන් කර ඇති පුද්ගලයන් ද පාර්ශ්වකරුවන් කරමින් දිසා අධිකරණයෙහි නඩුවක් පවරා එකී ණය මුදලේ නොගෙවා ඇති ප්‍රමාණය හා ඊට අදාළ පොලිය අය කර ගැනීමට එම බැංකුවට හෝ මූල්‍ය ආයතනයට නෛතික ප්‍රතිපාදන ලබා දී ඇත.

තවද යම් හිතවතෙක් වෙනුවෙන් මෙලෙස ඇප බැඳුම්කරයකට අත්සන් කර ඇපකරුවෙකු වී එම මුදල් ප්‍රධාන ණයකරු ගෙවීම පැහැර හරින අවස්ථාවක ප්‍රධාන ණයකරු මඟින් හෝ ඇපකරු මඟින් බැංකුව සමඟ සාකච්ඡා කර හිඟ වාරික ගෙවා ගිණුම යාවත්කාලීන කරගත හැකිය. එවිට ණය තොරතුරු කාර්යාංශයේ ලේඛනයේ නිසි පරිදි ගෙවන ණයක් ලෙසට ඇතුළත් කර ගැනීමේ හැකියාව ඇති බව ද, සම්පූර්ණ ණය මුදල ගෙවා නිම කරනු ලැබුවහොත් ගෙවා ඇති ණයක් ලෙසට ඇතුළත් කර ගැනීමේ හැකියාව ඇති බව ද සිහි තබා ගත යුතුය. එබැවින් ඔබ මේ කරුණු පිළිබඳව නිසි අවබෝධයක් ඇතිව යම් ණය ගනුදෙනුවකදී ඇපකරුවන් ලෙස බැඳුම්කර වලට ඇතුළත් වීම සිදු නොකළහොත් ඔබගේ අවශ්‍යතාවකට බැංකුවකින් හෝ වෙනත් මූල්‍ය ආයතනයකින් ණයක් ලබා ගන්නට සිදුවූ අවස්ථාවකදී එය ඔබට බාධාවක් වන්නට ඉඩ ඇති බව සිහි තබා ගත යුතුය.

 

ජ්‍යෙෂ්ඨ නීතීඥ මහින්ද ලොකුගේ

සැකසුම
ඉන්දු පෙරේරා

TT Ads

Leave a Reply

Your email address will not be published. Required fields are marked *
You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>