TT Ads

කුමරි බඹසර, පතිවත, කන්‍යා භාවය වැනි කුමන වදනකින් හැඳින්වුවද අප කතා කරන්නේ එකම දෙයක් පිළිබඳවයි. ඒ කාන්තාවකගේ පිවිතුරු බව පෙන්වන සංකේතය යැයි අප සමාජයේ සාම්ප්‍රදායිකව පිළිගනු ලබන සංකේතයක් පිළිබඳවයි. බටහිර සමාජයේ මෙය සැළකිල්ලකට නොගන්නා තත්වයකට පත්ව ඇතත්, අප සමාජයේ ද අතීතයේ තරමට වර්තමානයේ මේ පිළිබඳව ඇති සැළකිල්ලක් නොතිබුණත්, මෙය දැඩිව සොයා බලන්නන් දුර්ලභ නැහැ. තරුණියකගේ කන්‍යාභාවය රඳා පවතින ‘කන්‍යා පටලය’ පිළිබඳ පසුගිය වසර ගණනාව මුළුල්ලේ විවිධ මාධ්‍ය ඔස්සේ මේ පිළිබඳ කළ වෛද්‍ය විද්‍යාත්මක දැනුවත් කිරීම් නිසා බොහෝ තරුණියන් නිරපරාදේ දෝෂාරෝපණයට ලක්වන්නට තිබුණු අවස්ථාවලින් නිදොස් වුණා. අතීතයේ කන්‍යාභාවය නිසා තරුණියන්ගේ ජීවිත අඳුරු බවට පත්වූ අවස්ථා ඕනෑ තරම් දක්නට ලැබුණා. 1984 වසරේදී ‘දෙවැනි ගමන’ නමින් අප රටෙහි සිනමා පටයක් තිරගත වන්නේ ද මේ සමාජ ගැටලුව පිළිබඳ කතා කරන්නටයි. එහිදී අවසානයේ සියල්ල සතුටින් නිමාවට පත් වුවද එවැනි සතුටුදායක නිමාවන්ට පත් නොවූ ජීවිත ද බොහෝ තිබෙනවා.

කෙසේ මුත් කන්‍යාභාවය පිළිබඳ වෛද්‍ය විද්‍යාත්මක පැහැදිලි කිරීම්වලින් පසුව ඇතැමුන් නැගූ චෝදනාව වූයේ ඇතැම් තරුණියන් ‘වැරදි ක්‍රියාවල’ යෙදී, පසුව මෙම වෛද්‍ය විද්‍යාත්මක පැහැදිලි කිරීම්වලට මුවා වී සිය වරද වසා ගන්නා බවයි. නමුත් ‘වැරදි ක්‍රියාවන්ගේ’ නිරත වුව ද කන්‍යා පටලය ආරක්ෂා කරගන්නට සමත් තරුණියක් සිටින්නේ නම් ඔවුන් මෙසේ සිතන පුද්ගලයන්ගේ ප්‍රශංසාවට ලක්විය හැකි බව මොවුන් සිතන්නේ නැහැ. අනෙක වර්තමානයේ කෘත්‍රිම ලෙස කන්‍යා පටලය නැවත සකස්කිරීමේ පහසුකම් ද තිබෙන බව කවුරුත් දන්නා දෙයක්. ඒ නිසා තරුණියකගේ පිරිසිදු බව මනින්නට සිරුරේ කොටසක් වන කන්‍යා පටලය නමැති ‘සම් කැබැල්ල’ මත රඳා පැවතීම කෙතරම් දුරට යුක්ති සහගත ද යන්න කල්පනා කොට බැලිය යුතු වෙනවා. මන්ද තරුණියකගේ අනාගත ජීවිතයේ සාර්ථකත්වය රඳා පවතින්නේ ‘සම් කැබැල්ලක්’ මත නොව ඇය තුළ ගොඩ නගා ගන්නා අධ්‍යාත්මික බව, අධ්‍යාපනික හා සමාජ දැනුම ආදිය මත වන නිසයි. කෙසේ වෙතත් තවමත් බොහෝ දෙනෙකු තුළ මේ පිළිබඳ වැරදි මත ඇති බැවින් ඒ පිළිබඳ යමක් කතා බහ කිරීමේ වරදක් නැහැ.
කන්‍යා පටලය ඉංග්‍රීසි බසින් හඳුන්වනු ලබන ්‍යහපැබ නම් වදන බිඳී ඇත්තේ ‘පටලය’ යන්න හඳුන්වනු
ලබන ග්‍රීක වදනින්. එමෙන්ම ග්‍රීක දේව විශ්වාසවලට අනුව ඔවුන්ගේ විවාහය සම්බන්ධ දෙවියා වන්නේ ද ‘හයිමන්’. තරුණිකගේ ප්‍රථම ලිංගික එක්වීමකදී ‘බිඳී යාම’, ‘ඉරීම‘, ‘කැඩීම’ ආදී බොහෝ දේ සිදුවන්නේ මෙයටයි.

වසර දහස් ගණනක් තිස්සේ බොහෝ සමාජයන්වල පැවති විශ්වාසය වූයේ මෙය බිඳී යද්දී වේදනාවක්
දැනෙන බවයි. එබැවින් වර්තමානයේ ද තරුණියකට මෙම වේදනාව දැනිය යුතු යැයි පොදු පිළිගැනීමක් තිබෙනවා. එමෙන්ම මෙය බිඳී යාමේදී රුධිර වහනයක් වන බව ද පවතින තවත් එක් විශ්වාසයක්. විවාහයේ දෙවැනි දවසේදී මනාලියගේ ඇතැම් නැන්දම්මාවරුන් මෙසේ වහනය වූ රුධිරය සහිත සුදු රෙදි කඩ බැලීමට ‘පොර කන’ අවස්ථාවන් ද දක්නට ලැබෙනවා. එක් මංගල අවස්ථාවද මනාලයාගේ පාර්ශ්වයේ වැඩිහිටියෙක් සියලු දෙනාටම දැනුම් දුන්නේ ‘මනාලියගේ පෙරමග සළකුණු සුබ‘ බවයි. එයින් පැවසුනේ සුදු රෙදි කඩ මත රුධිරය පැවති බවයි. එක් විවාහක යුවලක් පවසා සිටියේ ඔවුන් විවාහයට පෙර ‘තහනම් ගහේ ගෙඩිවල රස’ බැලූ මුත් වැඩිහිටියන් සැනසීම සඳහා වෙනත් බාහිර ආකාරයකින් රුධිරය ස්වල්පයක් රෙදි කඩ මත තවරා ගත් බවයි. කෙසේ නමුත් අද ද මෙවැනි කරුණු සොයා බලන විවාහයන් කොතෙකුත් දක්නට ලැබෙනවා. වැඩිහිටියන් පමණක් නොව සියලු දේ පිළිබඳවම මනා අවබෝධයක් ඇති තරුණයන් පවා මේ ‘සම් කැබැල්ල’ පසුපස දිව යන්නේ එය තරුණියකගේ පිවිතුරු බව මනින් එකම සංකේතය ලෙස සිතමින්. එසේ හෙයින් තවමත් බොහෝ දෙනෙකු මේ පිළිබඳව දරන්නේ වැරදි අදහස් බව පැහැදිලියි.

වෛද්‍ය විද්‍යාත්මකව නම් බිළිඳියක් ලෙස උපදින අවස්ථාවේදීම බොහෝ දෙනෙකුගේ කන්‍යා පටලය පිහිටන්නේ නැහැ. බොහෝ කන්‍යා පටල ‘ඩෝනට්’ එකක හැඩයෙන් මැදින් සිදුරක් සහිතව පිහිටා තිබෙනවා. අලුත් උපන් අවස්ථාවේදී කන්‍යා පටලය ඉතා පැහැදිලිව දකින්නට ඇති අතර එය ඉතා තද ගතියෙන් ද යුක්තයි. නමුත් වයසින් වැඩෙත්ම බොහෝ කන්‍යා පටල තුනී බවට පත්වන අතර මැදින් ඇති සිදුර ද පළල් වෙනවා. එමෙන්ම ශාරීරික ක්‍රියාකාරකම් නිසා ද කන්‍යා පටලය තවත් තුනී වී යාමට ඉඩ ඇති බව ද සොයාගෙන තිබෙනවා.

කෙසේ නමුත් ඇතැමුන් විශ්වාස කරන පරිදි කන්‍යා පටලය යෝනි මාර්ගය සම්පූර්ණයෙන් වසාගනිමින් පැතිරී ඇති දෙයක් නොවෙයි. නමුත් කලාතුරකින් එවැනි තත්වයන් දැකිය හැකි අතර එවැනි අවස්ථාවක සුළු සැත්කමකින් කන්‍යා පටලයෙහි සිදුරක් ඇති කළ යුතුයි. සාමාන්‍යයෙන් බොහෝ දෙනෙකු සිතා සිටින පරිදි එවැනි තත්වයක් පැවතියේ නම් තරුණියන්ට මාසික ඔසප් වීම සිදුවන්නට හැකියාවක් නැහැ. මන්ද එවැනි පිහිටීමක් තිබුණොත් යෝනි මාර්ගය අවහිර වන නිසයි. කෙසේ නමුත් සෑම තරුණියකගේම කන්‍යා පටලය මැද ඇති සිදුර ඩෝනට් එකක හැඩයෙන් යුක්ත වන්නේ නැහැ. ඇතැමුන්ගේ ඇත්තේ ‘ඉනිමඟක්’ වැනි දිගටි හැඩයක්. මේ සිදුර හරහා ඉනිමඟක මෙන් හරස් අතට සම් කොටස් තැනින් තැන වැඩී තිබෙනවා. ඇතැම් තරුණියන්ගේ කන්‍යා පටලය මී වදයක් මෙන් සිදුරු කිහිපයකින් යුක්තයි. එමෙන්ම තරුණියක් 200 දෙනෙකුගෙන් එක් අයෙකුගේ කන්‍යා පටලය මැද ඇති සිදුර ඇඟිල්ලක් ඇතුළු කිරීමට පවා නොහැකි ලෙස කුඩාවට පිහිටා තිබෙනවා. එවැනි අවස්ථාවකදී ප්‍රථම ලිංගික එක්වීමේදී පවා මෙය බිඳී යන්නේ නැහැ. එවැනි තත්වයන්වලදී සුළු ශල්‍යකර්මයක් මගින් මෙය විශාල කරන්නට සිදුවූ අවස්ථාවන් ද ඕනෑ තරම් අසන්නට ලැබෙනවා. කන්‍යා පටලය පිළිබඳ මේ තොරතුරු අනාවරණය කරමින් නිව්යෝර්ක් නුවර හන්ටර් කොලේජ් හි හෙද මහාචාර්යවරියක වන කැරොල් රෝයි දීර්ඝ නිබන්ධනයක් ද සම්පාදනය කොට තිබෙනවා.

බොහෝ දෙනෙකු විශ්වාස කරන පරිදි මේ තුනී පටලය කැඩී බිඳී යද්දී දැනෙන්නේ ඉතා සුළු වේදනාවක්. එක්කෝ වේදනාවක් දැනෙන්නේම නැහැ. නමුත් වේදනාවක් දැනිය යුතු යැයි සාම්ප්‍රදායිකව පිළිගැනීමක් පවතින නිසා ප්‍රථම ලිංගික එක්වීමේදී වේදනාවක් දැනුණේ යැයි ඇතැම් තරුණියන් පවසනවා. ප්‍රථම ලිංගික එක්වීමේදී වේදනාවක් දැනෙන්නේ සැබවින්ම මේ පටලය බිඳී යාම නිසා නොවෙයි. බොහෝ තරුණියන් විවිධ හේතු නිසා ප්‍රථම ලිංගික එක්වීම යනු ‘මහා භයානක අත්දැකීමක්’ යැයි පෙර සිටම ඇති කරගත් භීතිය නිසා ඇගේ යෝනි ප්‍රදේශයේ ඇතිවිය යුතු ශාරීරික ඉහිල් බව ඇති වන්නේ නැහැ. අනෙක පිරිමි පාර්ශ්වයෙන් සිදුවන යම් යම් ක්‍රියාවන් නිසා ද මෙම ඉහිල්වීමට බාධා ඇති වෙනවා. එවිට යෝනි ප්‍රදේශය ආශ්‍රිත මාංශ පේශී සංකෝචනය වී පැවතීමෙන් ලිංගික එක්වීමට බාධා ඇති වෙනවා. වේදනාව ඇතිවන්නේ ඒ හේතුව නිසා මිස කන්‍යා පටලය බිඳී යාම නිසා නොවෙයි.

“තමන්ගේ සහකාරිය පිළිබඳ ඉතා සංවේදීව සිතන තරුණයන් පවා ලිංගික උපක්‍රම නිසි පරිදි යොදා නොගැනීම නිසා ලිංගික එක්වීම සහකාරියට වේදනාවක් ගෙන දෙන අවස්ථාවන් ඉතා බහුලයි” යනුවෙන්
ලිංගික චිකිත්සාව පිළිබඳ ආචාර්යවරියක වන සැන්ඩ්‍රා ලයිබ්ලම් පවසනවා.

කන්‍යා පටලය ගැටලුවක් කරගත් තරුණයන් සේම වැඩිහිටියන් ද ඕනෑ තරම් දක්නට ලැබෙනවා. පිරිමින්ට ද කන්‍යාභාවය පෙන්වීම සඳහා යම් නිර්ණායකයක් පැවතියේ නම් ඔවුන් මේ තරමටම තරුණියන්ගේ කන්‍යාභාවය පසුපස ලුහුබැඳ නොයා යන්නට ඉඩ තිබෙනවා. කෙසේ වෙතත් වඩාත් වැදගත් වන්නේ යම් පුද්ගලයකු පිළිබඳ ඇති ‘චරිතවත් බව’ හෙවත් හොඳ නමයි. එය තරුණියන්ට පමණක් නොව තරුණයන්ට ද පොදු කරුණක්. සමාජය තුළ යහපත් පුරවැසියකු ලෙස ජීවත්වීම තුළින් ඇතිවන හොඳ නම් මේ දෙපාර්ශ්වයටම වටිනා ගූණාංගයක් වෙනවා. හොඳ නමක් නොමැතිව කන්‍යා පටලය පමණක් ආරක්ෂාවීමේ අර්ථයක් ඇත්තේ නැහැ. එමෙන්ම තරුණියකගේ මෙන්ම තරුණයකුගේ ද සැබෑ වටිනාකම රැඳී පවතින්නේ යහපත් හැදියාව, අවංක බව, සත්‍යගරුක වීම ආදී මානව ගුණාංගයන් මතයි. ඔබගේ යුග දිවියටත්, සමාජයටත් වඩාත් යහපත් හෙට දවසක් බිහිවන්නේ එවිටයි.

නිරංජන් චාමින්ද කරුණාතිලක

TT Ads

Leave a Reply

Your email address will not be published. Required fields are marked *
You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>