TT Ads

“කොහොම ඉව්වත් කෑමවල රසක් නැති වීම, හැම කෑමක්ම එකම රසයක් වීම කාන්තාවන් බහුතරයක් පෙළෙන සුලභ ගැටලුකි. මේ නිසාම ආහාර රස කරගත හැකි යැයි පැවැසෙන කෘත්‍රිම රස කාරක වර්ග රාශියක්ද වෙළෙඳපොළ අරක් ගෙන තිබේ. ගෘහණියන්ද වැඩි වශයෙන් මේවායේ පිහිට පතන්නේ තම ආහාර පිළියෙල කිරීම් වඩ වඩාත් රසවත් කර ගැනීමේ චේතනාව පෙරදැරිවය. නමුත් ආහාරයක නියම රස සේම ගුණයද ඉස්මතු කර ගැනීම සඳහා සම්පූර්ණ කරගතයුතු විශේෂ අංග රැසක්ම තිබෙන බව බොහෝ දෙනා නොදන්නා සහ නොසිතන කාරණාවකි. මේ සම්බන්ධයෙන් නිවැරදි කරුණු ගැන දැනුවත් වීමෙන් ඕනෑම කාන්තාවකට තම ආහාර පිළියෙළ කිරීම හා වඩාත් රසවත් කර ගැනීමට එතරම් අසීරු වන්නේ නැත.

ආහාරයක් පිළියෙල කිරීම සඳහා යොදා ගන්නා ආහාර ද්‍රව්‍යවල නැවුම්බව ඒ සඳහා ගැළපෙන කුළුබඩු රස කාරක වර්ග නිවැරදි මාත්‍රාවන්ගෙන් යෙදීම සේම නිවැරදි ගින්දර පාලනය ද අත්‍යවශ්‍යයෙන්ම තිබිය යුතුමය. විශේෂයෙන්ම ගින්දර පාලනයේ තිබෙන වැදගත්කම ඔබ සිතනවාට වඩා බොහෝ ඉහළය. ඒකාකාරීව එක දිගටම ගින්දර සැපයීමෙන් රසවත් ලෙස ආහාර පිළියෙල කරගත නොහැකිය. ආහාරයේ ස්වභායට අනුව අඩු වැඩි කරමින් එය පාලනය කිරීම අත්‍යවශ්‍යය. සාමාන්‍යයෙන් අපේ බහුතරයක් කාන්තාවන් පුරුදුව සිටින්නේ එකම උෂ්ණත්වයේ පිස නිමවනතුරු ආහාර ලිප මත තබාගෙන සිටීමය.

බතක් පිසීමේදී, වතුර නටා බත්ඇට තරමක් තැම්බෙන තුරු ගින්දර හොඳින් තිබිය යුතුය. නමුත් වතුර ගතිය අඩුවී ගෙන යන විට, ඉතාම මඳ ගින්දර ලැබෙන ලෙස ලිප සකස්කොට වසා බත්ඇට හොඳින් මෘදුවීමට කාලය ලබාදිය යුතුය. එසේම බතේ වතුර ගතිය හොඳින් සිඳුන විට, ඉක්මනින් බත නරක් වන්නේ ද නැත. බත රොස්වීමට, ඇට්ටකුනා හෝ බෙරි වීමට බලපාන්නේ ගින්දර පාලනයේ අඩුපාඩුය. බතක නියම රසය මතුකර ගැනීමට නම් මුලින්ම හොඳට ගින්දර ලබා දී පසුව ඉතාම මඳ ගින්දරක පිස ගැනීම කළ යුතුය.

මස් වර්ග පිසීමේදීද ඒවා කපා ගන්නා කැබැලිවල ප්‍රමාණයට අනුව කාලය තීරණය කළ යුතු වේ. සාමාන්‍ය තරමේ කැබැලි නම් විනාඩි 20ක් පමණ වැඩි ගින්දරේද තවත් විනාඩි 10ක් පමණ මඳ ගින්දරේද කැබැලි හොඳින් මෘදු වනතුරු පිස ගැනීම වඩාත් නිවැරදි ක්‍රමයයි. එසේම මස් වර්ග පිසීමෙදී පිසින ප්‍රමාණයට වඩාත් ගැළපෙන තරමේ භාජනයක් භාවිත කිරීමත් ඉතා වැදගත් කරුණකි.

පිසින ද්‍රව්‍යවල ප්‍රමාණයට වඩා විශාල සේම කුඩා භාජන භාවිත කිරීමෙන් නියම රස මතුවන ආකාරයට පිස ගැනීමට බාධා ඇතිවෙයි. ඌරුමස් වැනි මස්වර්ග පිසීමට නම් තරමක් වැඩි කාලයක් ගත යුතුය.
මාළුවර්ග නම් විනාඩි 20ක් පමණ පිසීම ප්‍රමාණවත්ය.

කොළපැහැය ආරක්‍ෂාවන ආකාරයට කෙටි කාලයක් තුළ පලා වර්ග පිසගත යුතුවේ. වැඩි උෂ්ණත්වයක මිනිත්තු දෙකක් පමණ පිස ගැනීම ප්‍රමාණවත්ය. එසේම කොළ පැහැය රැකෙන ආකාරයට පිසගත් එළවළු පලාවර්ග ආදිය ලිප මත නොතබා ඉක්මනින් වෙනත් රස්නය නැති බඳුනකට මාරු කරගන්න. නැතිනම් ලිප මත භාජනයේ උණුසුමත් සමග ඒවායේ වර්ණය වෙනස් වී වැඩි තැම්බීමකට ලක්විය හැකිය. එසේම එසේ පිසගත් ව්‍යංජන වර්ග වසා තැබීමෙන්ද වර්ණයේ වෙනසක් සිදු විය හැකිය.

එසේම පරිප්පු වැනි ව්‍යංජනයක්ද ප්‍රමාණයට තම්බා පිසගත් පසු ලිප මතම තබා වසා තැබීමෙන් එහි ඉස්ම ගතිය සිඳී, වියළී, ඇට බෙරි වීමකටද ලක්විය හැකිය. එබැවින් පිසගත් පසු එවැනි ව්‍යංජන වහා ලිපෙන් බා වෙනත් සුදුසු තැනක තබන්න.
අල වර්ගවල නියම රස ලබා ගැනීමට නම් ඒවා පොත්ත පිටින්ම තම්බා පසුව එහි පොත්ත හැර කැබලි කපා පිස ගත යුතුය. එසේම මැටි භාජනවල ආහාර පිසීමෙන් වැඩි රසවත් බවක් ආහාරයට එකතු කර ගත හැකිවේ. ඒවා රත් වූ පසු උණුසුම රැඳී තිබීම, සිසිල් වීමට වැඩි වෙලාවක් ගතවීම වැනි කරුණු ආහාර පිසීමේදී වැඩි ප්‍රයෝජන ලබාගත හැකි කරුණුය.
උපදෙස් – ප්‍රවීණ සූපවේදී සුජිත් ආරියරත්න
සටහන – නිර්මලා කුමාරි සේනාරත්න

TT Ads

Leave a Reply

Your email address will not be published. Required fields are marked *
You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>