TT Ads

අධික රුධිර පීඩනය නිසි ඖෂධ භාවිතයෙනුත්, මනා ආහාර පාලනයෙනුත් පාලනය කරගත යුතු රෝගී තත්ත්වයකි. එසේ පාලනය නොකිරීමෙන් හෘද රෝග, අංශභාගය හා වකුගඩු ආබාධවැනි සංකූලතාවලට ඔබ ලක්වීමට ඇති ඉඩකඩ 99%කටත් වඩා ඉහළය. මෙරට සිදුකරන ලද නවතම වෛද්‍ය පර්යේෂණවලට අනුව ලාංකික වැඩිහිටි ජනගහනයෙන් තුනෙන් එකක් පමණ අධි රුධිර පීඩනයෙන් පෙළෙන බව හෙළිදරව් වේ. අධික රුධිර පීඩනය ලෙස හඳුන්වන්නේ රුධිර වාහිනී තුළ ගලා යන රුධිරය මඟින් එම රුධිර වාහිනී මත ඇති කරන පීඩනයයි. මේ අනුව රෝගී පුද්ගලයෙකුගේ රුධිර පීඩනය 120 80 යන අගයේ පැවැතිය යුතුය. රුධිර පීඩනය මැන බැලීමේදී රුධිර පීඩන අගය මීට වඩා වැඩි අගයක් පෙන්වයි නම් එම තැනැත්තා අධික රුධිර පීඩනයෙන් පෙළෙන අයෙකි.

රුධිර පීඩනය ඉහළ යාමට බලපාන හේතු

අධික රුධිර පීඩනය ඇතිවිය හැකි ප්‍රධාන හේතු දෙකක් පවතී. ඉන් පළමුවැන්න පාලනය කළ හැකි සාධකයි. දෙවැන්න පාලනය කළ නොහැකි සාධකයි. මේ අතරින් පාලනය කළ හැකි සාධක ලෙස සැලකෙන්නෙ දියවැඩියාව, අධික ස්ථූලතාවය (තරබරුව) මත්පැන් හා දුම්වැටි භාවිතය, ශාරීරික ව්‍යායාම හා ක්‍රියාකාරකම් මඳ බව යන තත්ත්වයෙන් වේ. පාලනය කළ නොහැකි සාධක අතරට ගැනෙන්නේ පරම්පරාවෙන් පැවත එන ජානමය බලපෑම, ස්ත්‍රී පුරුෂ බව, පුද්ගලයාගේ වයස, ලුණු භාවිතයට දක්වන දැඩි ගිජු බව (අධික සංවේදීතාව) යන තත්ත්වයන්ය.

අධික රුධිර පීඩනය තත්ත්වයෙන් මිදී නිරෝගීව ජීවත් වීමට නම්,

පළමුවෙන්ම සෑම පුද්ගලයෙක්ම මනා පාලනයකින් තමන්ගේ එදිනෙදා ආහාර පිළිවෙත් සකසා ගත යුතුයි. ඔබ තරුණ විය ඉක්මවා මැදි වයසට එළැඹෙන විට මනා ආහාර පාලනයකින් යුතුව කල්ගෙවූ පුද්ගලයෙක් නම් අධි රුධිර පීඩන තත්ත්වයන්ට ගොදුරු වීමෙ අවදානම අඩුය. තරුණ වියේ සිටම අලස ලෙස කාලය ගෙවීම (ක්‍රියාශීලි නොවන) මත්පැන් හා දුම්වැටි පානයට ඇබ්බැහි වූ සකස් කළ කෑම වර්ග බහුලව ආහාර ලෙස ගන්නා අය මැදි වයසට එළැඹීමත් සමගම මේ අවදානමට ලක්වීමේ ප්‍රවණතාව ඉතාම ඉහළය.

අධික රුධිර පීඩනයෙන් වළකින්න අනුගමනය කළ යුතු ආහාර පුරුදු
දෛනික ආහාර වේල් සඳහා බත් පිසින විට ශුද්ධ කරන ලද සම්බා සහල් වෙනුවට රතු නාඩු සහල් භාවිත කිරීම, රතු නාඩු සහල් වෙනුවට රතු කැකුළු සහල් භාවිතා කරනවා නම් එයද දිගින් දිගටම භාවිත නොකිරීම, අපේ පැරණි දේශීය සහල් වර්ග සොයාගත හැකි නම් (සුවඳැල්, පච්ච, පෙරුමාල්, කුරුළු තුඩ ආදී) එවැනි සහලින් බත සකස් කර ගැනීම.
උදෑසන ආහාරයට හෝ අනෙකුත් ආහාර වේල් සඳහා පාන් ඇතුළු පිටි වර්ග වෙනුවට හාල් පිටි, කුරක්කන් පිටිවලින් සෑදු ආහාර වර්ග සඳහා හුරු වීම, (පාන්පිටි වෙනුවට ආටා පිටිවලින් පිසූ ආහාරද වරින් වර ආහාරයට ගැනීම කළ හැකිය.)
කඩල, මුං ඇට, කව්පි, පරිප්පු, සෝයා වැනි රනිල බෝග එක් ප්‍රධාන ආහාර වේලකට දෛනිකව එකතු කරගැනීම හා මෙම ධාන්‍ය වර්ග ව්‍යාංජන ලෙසද සකස් කර ආහාරයට එක්කර ගැනීමද සුදුසුය.
අවම වශයෙන් සතියකට දින 3ක් වත් කජු හෝ රට කජු ප්‍රධාන ආහාර වේලට එක්කර ගැනීම.
අවම වශයෙන් දෛනික ආහාර වේල් දෙකකටවත් අතුරු පසක් ලෙස පලතුරු වර්ග තුනක්වත් කුඩා ප්‍රමාණයෙන් හෝ එක්කර ගන්න. කුඩා කෙසෙල් ගෙඩියක්, අලිගැට පේර මද භාගයක් පේර ගෙඩි භාගයක්, ගස්ලබු කුඩා තීරුවක් ලෙස පලතුරු ආහාරයට ගැනීම ඉතාමත් සුදුසුය.
ප්‍රධාන ආහාර වේල් තුනටම අලුත් එළවළු හා අලුත් පලා වර්ග කීපයක් ව්‍යංජන, සම්බෝල, සලාද හෝ මැල්ලුම් ලෙස එකතු කරගැනීම.
එළවළු ව්‍යාංජන පීරිසි කෝප්ප එකහමාරක් පමණවත් එක් වේලකට එක්කර ගත යුතු අතර මැල්ලුම් හෝ සලාද වරකට පීරිසි කෝප්පයක්ත් තරමින් එක්කර ගැනීම වඩාත් යහපත්ය.

ධාන්‍ය වර්ග එළවළු පලා හා පලතුරු වර්ගවලින් අධික රුධිර පීඩන තත්ත්වය පාලනයට ලැබෙන දායකත්වය
මෙහි සඳහන් කළ සහල් වර්ග, ධාන්‍ය වර්ග හා පලා වර්ගවල අධි රුධිර පීඩනය පාලනය සඳහා උපකාරී වෙන පොටෑසියම්, මැග්නීසියම්. ඛනිජ ලවණ හා කෙඳි (තන්තු)වලින් ඉතාම පොහොසත්ය. දෛනිකව යහපත් ආහාර සුසිරිත්වලට හුරුවූ කෙනෙකුට පාලනය කළ නොහැකි හේතුවකින් මිස අධි රුධිර පීඩන තත්ත්වයෙන් පහසුවෙන් මිදිය හැකිය.

කිරි ආහාරවල බලපෑම මොන වගේද?
කිරි ආහාර දෛනිකව ආහාර වේලට එක්කර ගැනීමේදී වඩාත් සුදුසු වන්නේ යොදය රහිත හෝ යොදය අවම කිරි දියර හෝ කිරිපිටි වර්ග භාවිත කිරීමයි. කිරි ආහාර මගින් කැල්සියම් හා ඛනිජ ලවණ අවශ්‍යතාවට සපුරා ගත හැකිය. කැල්සියම් යහමින් ශරීරයට ලැබීමද අධි රුධිර පීඩනය පාලනයට වැදගත් වේ. එහෙත් යොදය සහිත කිරි ආහාර මගින් ශරීරයට අහිතකර කොලෙස්ටරෝල් එකතු වීමට අවස්ථාව ලැබෙන බැවින් යොදය සහිත කිරී ආහාර ගැනීම නොකළ යුතුය. පිටි කිරි වර්ග වලින් ඈත්වී ඒ වෙනුවට දේශීය පලතුරු යුෂ වීදුරුවක (සීනි නොදමා) උදෑසනම පානය කළ හැකි නම් නීරෝගී බවට ඉතාමත්ම යහපත් වේ.

අධික රුධිර පීඩනය ඇති වීමට මස් – මාළු වර්ගවල බලපෑම
ඌරු මස්, හරක් මස්, එළු මස් වැනි සංතෘප්ත මේදය බහුලව අඩංගු මස් වර්ග වෙනුවට සම ඉවත් කළ කුකුළු මස් ආහාරයට ගැනීම වඩාත් යහපත්ය. මස්වර්ග කිසිවක් ආහාරයට නොගෙන හාල් මැස්සන්, සාලයා, හුරුල්ලා, පියාමැස්සා, හැදැල්ලා වැනි කුඩා මාළු වර්ගවලට හුරුවිය හැකි නම් වඩාත්ම යෝග්‍යයයි. මෙවැනි කුඩා මාළු සහ සැමන්, මෝරා මාළු වැනි මාළු වර්ගවල අඩංගු ඔමෙගා 3 ශරීරයට ඉතාම හිතකරය. මෙවැනි ආහාර මගින් රුධිරයේ අඩංගු හිතකර කොලෙස්ටරෝල් තත්ත්වය යහපත් අතට හැරවීමට විශාල දායකත්වයක් ලබා දෙයි. මේ නිසාම අධි රුධිර පීඩනයද යහපත් ලෙස පාලනය වීමක් සිදුවෙයි.

අධික පැණි රස කෑම, පැණිබීම හොඳද?
වෙළෙඳ පොළේ විකුණන කිසිම පැණි බීමක් පානය නොකර පිපාසය සංසිඳුවා ගැනීම සඳහා පිරිසිදු ජලය පාවිච්චි කිරීම වඩාත්ම සුදුසුය. මේවායේ අඩංගු රසකාරක, වර්ණකාරක, සුගන්ධකාරක, කෘත්‍රිම සීනි ආදියෙන් අධික රුධිර පීඩනය පමණක් නොව අධික ස්ථූලතාවය, දියවැඩියාව, පිළිකා, ස්නායුගත රෝග ආදී තත්ත්වයන් ඇති වන බව දැනටමත් වෛද්‍ය පර්යේෂණ මඟින් සනාථ වී තිබේ. ටොෆි වර්ග, චොකලට් වර්ග, කේක් අයිස්ක්‍රීම්, බූන්දි, මස්කට්, දොදොල්, සීනි අධික බිස්කට් ආදියෙනුත් උපරිම ලෙස ආහාරයට නොගෙන සිටීම හැම අතින්ම යහපත් වේ.

ජලය ඇරුනාම අපි විසින් පාලනය කළ යුතු හිතකර පාන වර්ග
තේ, (කොළ හා කළු තේ) කොළ කැඳ, කොත්තමල්ලි වතුර, පොල්පලා වතුර, රණවරා, බෙලිමල්, බාර්ලි, තැඹිලි, කුරුම්බා වැනි පානයන්ට හුරුවීමෙන් ශරීරයට එකතු වන අහිතකර විෂ කාරකවලින් උපරිම ලෙස මිදීමට හැකිය.

රුධිර පීඩනය සඳහා ආහාරවල අඩංගු ලුණුවලින් සිදු කෙරෙන බලපෑම
අධික ලුණු භාවිතය රෝග ගණනාවකට විශාල තර්ජයක් එල්ල කරයි. එක් පුද්ගලයෙක “දෛනිකව” ආහාරවලින් ශරීරයට එක්කර ගත යුත්තේ ලුණු (සෝඩියම් ක්ලෝරයිඞ්) ග්‍රෑම් 5වැනි ඉතාම සුළු ප්‍රමාණයක්, ආසන්න වශයෙන් මෙම ප්‍රමාණය තේ හැඳි එකකට සමාන බව මතක තබා ගන්න.

ලුණු භාවිතය අවම කළ හැකි ආකාරය
දිනපතා පිසින බත් හැලියට ලුණු එකතු කිරීම වහාම නතර කළ යුතුය.
පොප්කෝන් ලුණු දමා සකස් කරන ලද සියලුම බයිට් වර්ග, ටිපිටිප්, බිස්කට්, පොටේටෝ චිප්ස්, මීට් බෝල්ස්, ටින් මාළු, සොසේජස්, හැම්, සුප්කැට, සෝස්වර්ග, ක්‍ෂණික නූඞ්ල්ස්, චීස්, චට්නි වර්ග, චිලී පේස්ට්, මාමයිට්, චොක්ලට්, අච්චාරු වැනි ආහාරවලින් උපරිම ලෙස පරෙස්සම් වීම.
නිවසේදී සකස් කරන සියලුම ව්‍යාංජන හා වෙනත් දේ සඳහා ලුණු අවම ලෙස යෙදීම
ටින් කරන ලද මාළු වර්ග පිසීමේදී එහි ඇති දියර සම්පූර්ණයෙන්ම ඉවත් කර පිසීමට ගැනීම.
සකස් කළ හා ඇසුරුම් කරන ලද ආහාර වර්ග ගැනීමේදී ඒවායේ අඩංගු ලුණු, සීනි, තෙල් ප්‍රමාණයන් පිළිබඳව සඳහන්ව ඇති ලේබලය කියවා දැනුවත් වීම.

අධික රුධිර පීඩනය හා ව්‍යායාම අතර සම්බන්ධය
කම්මැලිකම, ක්‍රියාශීලී නොවීම අධික රුධිර පීඩන තත්ත්වය ඇති වීමට සෘජුලෙස බලපායි. ඒ නිසා දිනකට අඩු තරමින් පැයක් හෝ පැය භාගයක්ත් ව්‍යායාම කළ යුතුය. හැල්මේ දිවීම(සෙමෙන් දිවීම), පිහිනීම, බයිසිකල් පැදීම හා තම වයසට සුදුසු ව්‍යායාමවල නිරත වීමෙන් අධික රුධිර පීඩනය මනාලෙස පාලනය කර ගත හැකිය.

Herald Of Health ඇසුරින්
රඹුක්කන කීර්ති එස්. කුමාර

TT Ads

Leave a Reply

Your email address will not be published. Required fields are marked *
You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>