TT Ads

වැසිකිළි යෑමේ හුරු පුරුදු රටාවේ හිටිවනම ඇතිවන යම් වෙනසක් බොහෝ අය එතරම් අවධානයට ලක් කරන්නක් නොවේ. ඒවා ගණන් ගත යුතු තරමේ තත්ත්වයක් නොවේ යැයි තම තමන්ම තීරණය කොට නොතකා හැරීම බොහෝ විට සිදු වන දෙයයි. එහෙත් ඒ ආකාරයට වැසිකිළි යන සුපුරුදු රටාවේ වෙනස්කමකින් අපට ඉඟි කරන්නේ ශරීර අභ්‍යන්තරයේ පවතින බරපතළ රෝගී තත්ත්වයක් පිළිබඳව වන්නටත් හැකි නිසා එය සෑම විටම නොතකා හැරිය යුතු නොවන බව අවධාරණය කළ යුතුවේ. විශේෂයෙන් වියපත් වීමත් සමග හට ගන්නා වැසිකිළි යෑමේ එබඳු වෙනස්කමක් නොතකා හැරීම තුළ පසුකාලීනව කිසිවක් කර කියාගත නොහැකි පසුතැවීමක් පමණක් ඉතිරි කරන්නටද හැකියාව තිබේ.

මල ආකාරයට අපේ ශරීරයෙන් බැහැර වන්නේ අප ගන්නා ආහාර දිරවා සියලු පෝෂණය සිරුරට අවශෝෂණය කර ගත් පසුව ඉතිරිවන රොඩු ස්වල්පයයි. එලෙස සිරුරින් බැහැර කරන්නට නියමිත ජීර්ණය වූ ආහාර වල අවශෝෂණ කොටස්වලට එකතු වන පිත් වර්ණකය හේතුවෙන් මල කහ පැහැ ස්වභාවයක් උසුලයි. පිත යනු රුධිර සෛල කල් ඉකුත් වීමෙන් හට ගන්නා අතුරු ඵලය ලෙස හඳුන්වන නමයි.

සියලු දියරමය කොටස් උරා ගැනීමෙන් පසුව සිරුරෙන් බැහැර වන මල යම් වියළුණු ස්වභාවකින් යුතු වීම සාමාන්‍ය තත්ත්වයයි. එහෙත් දින දෙක තුනක් මල පිට කරන්නට නොහැකි වූ විටදී දිගින් දිගටම ඒවායේ පවතින දියරමය ස්වභාවය බැහැර වීම නිසා මල තව තවත් වියළුණු තත්ත්වයකට පත්වේ. ඒ ආකාරයට තවත් දිනක් දෙකක් ගත වන විටදී දියරමය ස්වභාවය තව දුරටත් උරා ගැනීම නිසා අවසානයේ මල පිට කරන්නට නොහැකි ඝන ස්වභාවයකට පත්වේ.

අපහසුතාවකින් තොරව බුරුල් ස්වභාවයකින් යුතුව මලපහ පිට කරන්නට නම් කෙඳි සහිත ආහාර වැඩිපුර ගැනීම අවශ්‍යවේ. එය තවදුරටත් පහසු වන්නට රතු බත්, එළවළු, පලතුරු ආහාරයට එකතු කර ගන්නට සිදුවේ. ඒ අතර බීමට ගන්නා ජලය ප්‍රමාණයද වැඩි කිරීම අවශ්‍යවේ.
දිනපතා මලබද්ධය පැවැතීමේ ප්‍රතිඵලයක් ලෙස ලේ නහර පුපුරා ලේ ගැලීමක් හෝ අධෝමාර්ගයේ අවසන් අන්තය පුපුරා ඉන් දැඩි වේදනාවක් හට ගන්නා අවස්ථා තිබේ. එලෙස ලේ නහර පුපුරා බිංදු ආකාරයට වෑස්සෙන ලේ තද රත් පැහැයකින් යුතු වන අතර එය මාළු ලේ වල පැහැය විය නොහැකිය. එහෙත් ලේ සමග මල මිශ්‍ර වී මාළු ලේ පැහැයෙන් යුතුව පිටවනවා නම් එය නොතකා හැරිය යුතු නොවන බරපතළ රෝගයක් පිළිබඳව අනතුරු ඇඟවීමක්ද විය හැකිය. පිත් සමග හිටිවනම ශරීරය කෘෂ වීම, ආහාර අරුචිය පවතීනම් එය ආහාර මාර්ගයේ පැවැති පිළිකාවක් බොහෝ දුර පැතිර ගොස් අවසන් අදියරට ළඟා වීමක් වන්නටද බැරිකමක් නැත.

මෙවැනි තත්ත්වයකදි අල්ට්‍රා සවුන්ඞ් ස්කෑන් හෝ සී.ටී. ස්කෑන් පරීක්ෂණ මගින් රෝගී තත්ත්වය පිළිබඳව යමක් හඳුනා ගන්නට හැකියාව තිබේ. එහෙත් වඩා ඉක්මනට නිශ්චිතවම සහ කල්වේලා ඇතිව මෙබඳු තත්ත්වයක් නිර්ණය කර ගැනීමට ඔබ යා යුතු පරීක්ෂණය වන්නේ කොලොනොස්කොපි (colonosecopy) පරීක්ෂණයයි.
කොලොනොස්කොපි පරීක්ෂණයට මුහුණ දෙන රෝගියෙකු පෙර දිනයේ පටන් ඒ සඳහා සූදානම් වීම අවශ්‍ය වේ. ආහාර මාර්ගයේ ඇති සියලු මලද්‍රව්‍ය බැහැර කරවීම සඳහා විරේක ඖෂධයක් ලබා දීම පළමු කොට සිදු කරයි.

පරීක්ෂණයට මුහුණ දෙන රෝගියා ඇඳේ දිගාවී පැත්තකට හැරී සිටින විට පෑනක් බඳු වූ එහෙත් ලිස්සන සුළු හා නම්‍යශීලී බවකින් යුතු බටයක් සහිත උපකරණයක් රෝගියාගේ සිරුරේ පහළ කෙළවරින් මල මාර්ගයට ඇතුළු කරයි. ඒ රෝගියාට කිසිදු වේදනාවක් නොදැනෙන ආකාරයටය. බටයේ කෙළවර ඇති බල්බයක් සහිත කැමරාව නිසා එය ගමන් කරන මාර්ගයේ ඇති සියලු දේ බලා ගන්නට හැකියාව තිබේ.

බඩේ දකුණු පැත්තේ පහළ කෙළවරේ සිට ඉහළටත් ඉහළින් දකුණේ සිට වමටත් නැවත ඉහළ වම් කෙළවරේ සිට වම් පස පහළ ප්‍රදේශයටත් එතැනින් මල පිටවන අවසන් සිදුර දක්වාත් අපේ මල මාර්ගය පැතිර පවතී. මෙම මල මාර්ගය දිගේ ඉහළට යවන කැමරාව සහිත උපකරණය එම මාර්ගයේ ඇතුළත බිත්තිය සම්පූර්ණයෙන් පරීක්ෂාවට ලක් කරන අතර එහිදී හමුවන ගැටයක්, තුවාලයක්, ලේ ගලන තැනක්, විශේෂ අවධානයට ලක් කරයි. එවැනි අසාමාන්‍ය වර්ධනයක් හෝ සැක සහිත ස්වභාවයක් ඇති තැනකින් සෛල කිහිපයක් ඉවත් කර ගන්නට ද කටයුතු කරයි.

මේ ආකාරයට ඉවතට ගන්නේ රෝම කූපයක ප්‍රමාණයේ සෛල ස්ථරයක් වන නිසා එය කිසිසේත් රෝගියාට දැනෙන්නේ හෝ වේදනා ගෙන දෙන්නක් නොවන බව පැවැසිය යුතුය.එසේ ඉවතට ගත් සෛල කිහිපයක් වර්ණ ගන්වා කුඩා දේ ලොකු කර බලන අන්වීක්ෂ පරීක්ෂාවකට ලක් කරන අතර එහිදී එම සෛල පිළිකා වර්ධනයක්ද එසේ නොවන තත්ත්වයක්ද යන්න ස්ථිරවම තහවුරු කර ගත හැකිය.

පිළිකාවක් යනු මස් ගුලියකි. ආහාර මාර්ගයේ පිළිකා තත්ත්වයන් ඉතා සුලබ වන අතර එවැනි බොහෝ
රෝගීන් ප්‍රතිකාර කරා යොමු වන්නේ පිළිකාව බොහෝ සෙයින් පැතිරී සිදු කළ හැකි ප්‍රතිකාර ඉතා අවම මට්ටමක පවතින අදියරකදියි. එහෙත් ආහාර මාර්ගයේ පිළිකාවක් කල් තියා හඳුනා ගත හැකි නම් පිළිකාව වර්ධනය වී ඇති ආහාර මාර්ගයේ එම කොටස පමණක් ඉවත් කිරීමෙන් සම්පූර්ණයෙන් සුවපත් වන්නට හැකියාව තිබේ. අප මුලින් සඳහන් කළ අනතුරු ඇඟවීම් යාන්තමට හෝ දැනෙන්නට පටන් ගත් සැණින් එය ආහාර මාර්ගයේ පිළිකාමය තත්ත්වයක්දැයි හඳුනා ගැනීමට දැන් හැකියාව තිබේ. ඒ සඳහා ඇති සාර්ථකම වෛද්‍ය පරීක්ෂණය වන කොලොනොස්කොපි පරීක්ෂණයට යොමු වීමෙන් එවැනි රෝගි තත්ත්වයන් කල් තියා හඳුනා ගෙන සම්පූර්ණයෙන් සුවපත් වීමට හැකියාව පවතී.

කොලොනොස්කොපි පරීක්ෂණයට මුහුණදෙන රෝගියෙකුට එම පරීක්ෂණය අවසානයේදී ඡායාරූප සමග පරීක්ෂණ වාර්තාව ලබා දෙයි. එම පරීක්ෂණ වාර්තාව ඉතා සුරක්ෂිතව තබා ගත යුතු වන්නේ ප්‍රතිකාර වලට පසුව නැවත සිදු කරන පරීක්ෂණ වාර්තා හා පෙර වාර්තා සංසන්දනය කර බලන්නටද සිදුවිය හැකි නිසයි.
වැසිකිළි යෑමේ වෙනසක් ඒ හා සම්බන්ධව වෙනත් අසාමාන්‍යතාවක් දැනෙන්නට පටන් ගත්විටදී එම තත්ත්වය අද හෙට හරි යාවි යැයි කල්මැරීම නියපොත්තෙන් කඩා දැමිය හැකි දේ පොරොවෙන් කපා දමන්නටවත් බැරි තත්ත්වයකට පත් කර වන්නක් විය හැකිය. එහෙත් එබඳු සුළු අනතුරු ඇඟවීමක් සම්බන්ධයෙන් පවා අවධානය යොමු කරමින් මෙවැනි අති සාර්ථක වෛද්‍ය පරීක්ෂණයක පිහිට ලබා ගැනීමට දැන් කොතෙකුත් හැකියාව තිබේ. එබඳු වූ පරීක්ෂණයක් ඔබ අන්ත අසරණ තැනකට ඇද දමා කිසිවක් කර කියා ගත නොහැකි තත්ත්වයක් දක්වා දුර දිග යන්නට පෙරාතුව සියල්ල කල් තියා ගොඩින් බේරා ගන්නට පාර කියා දෙනු ඇත.

ගාල්ල කරාපිටිය ශික්ෂණ රෝහලේ
කායික රෝග විශේෂඥ
වෛද්‍ය උපුල් ද සිල්වා

TT Ads

Leave a Reply

Your email address will not be published. Required fields are marked *
You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>