අපි සිතනවාටත් වඩා අපේ සිරුර පුදුමාකාරයි. වැඩිදෙනෙක් නොදන්නවා වුණාට සිරුරේ සමබරතාව රැකගනිමින්, තමන් විසින්ම තමාව සුවකර ගැනීමේ අපූර්ව හැකියාවක් අපේ සිරුරට තිබෙනවා. ඒ සිරුරේ ස්වභාවිකවම පිහිටලා තිබෙන ගතික ශක්තින්වල ආධාරයෙන්. විශේෂයෙන්ම සාම්ප්‍රදායික චීන ප්‍රතිකාර ක්‍රමය තුළදී ‘චී’ යනුවෙන් හැඳින්වෙන, සිරුරේ නිරෝගි පැවැත්මට ඉවහල්වෙන මෙම ධනාත්මක ශක්ති ධාරාවන් උත්තේජනය කිරීම මගින් රෝග රැසකට සහනය ගෙනදීමක් සිදුවෙනවා. මේ ‘චී’ ශක්තිය උත්තේජනය සඳහා යොදාගන්නා එක් චිකිත්සාවක් තමයි ‘ගුවාෂා’ සත්කාරය කියන්නේ. මෙහිදී සිදුවෙන්නේ පැතලි කාඞ්බෝඞ් කැබැල්ලක ස්වභාවයෙන් යුතු මෙවලමක් ආධාරයෙන් සිරුරේ නොයෙකුත් ස්ථාන මතට යම්කිසි පීඩනයක් යොදමින් සීරිම මගින්, ගලායාම අවහිරවී ඇති ‘චී’ ශක්ති ධාරාවන් යළි පණගැන්වීමක්. මින් සිරුරේ නිරෝගිකම රැකෙනවා විතරක් නෙවෙයි රූ සපුව සුන්දරවීමකුත් සිදුවෙනවා. රුව රැකගැනීම සඳහා මුහුණට සිදුකරන ‘ගුවාෂා ෆේෂල්’ සත්කාරය අද වන විට බටහිර රටවල ඉතාම ජනප්‍රිය රූපලාවන්‍ය සත්කාරයක්. දැන් දැන් මෙය ලංකාවේත් ක්‍රමයෙන් ප්‍රචලිත වෙමින් තිබෙනවා.
ගුවාෂා චිකිත්සාවෙන් ලැබෙන ප්‍රයෝජන මොනවාද ? පවතින රෝගී තත්ත්වය අනුව ගුවාෂා සත්කාර ලබාදෙන සිරුරේ ස්ථානත්, ලැබෙන ප්‍රතිඵලයත් වෙනස් වෙනවා. අක්මාවේ ප්‍රදාහ තත්ත්ව, මිග්රේන්, ටූරට් නැමැති ස්නායු රෝගී තත්ත්වය වගේම කාන්තාවන්ගේ ආර්තවහරණයට පෙර ඇතිවන අසහනකාරී තත්ත්ව මඟහරවා ගැනීමටත් ගුවාෂා සත්කාරය සාර්ථකව භාවිතා කෙරෙනවා. සිරුරේ විවිධ ස්ථානවල ඇතිවන දීර්ඝකාලීනව පවතින වේදනා සමනය කරන්නත් ගුවාෂා චිකිත්සාවට පුදුමාකාර හැකියාවක් තිබෙනවා. ගුවාෂා ෆේෂල් සත්කාරය මගින් මුහුණේ රුධිර ගමනාගමනය ක්‍රමවත් වීමකුත් සිදුවෙන නිසා තරුණ පෙනුම රැකදීමටත් එය ඉවහල් වෙනවා.
ගුවාෂා මෙවලමක් තෝරාගැනීමේදී සැලකිලිමත් විය යුතු කරුණු ගුවාෂා මෙවලම මගින් සිරුර හෝ මුහුණ සීරීමේදි ඇතිවන ඝර්ෂණය තුළින් අතිධ්වනි කම්පන නිපදවීමක් සිදුවෙනවා. එහෙම නිපදවෙන කම්පනවල තීව්‍රතාව හා සංඛ්‍යාතය තීරණය වෙන්නේ ඒ සඳහා යොදාගන්නා මෙවලමේ ස්වභාවය අනුවයි. හොඳම ප්‍රතිඵල ලබාගන්න පුලු‍වන් වෙන්නේ කම්පනවල තීව්‍රතාව හා සංඛ්‍යාතය ඉහළ ගිය තරමටයි. මොකද එතකොට උත්පාදනය වෙන අනුනාදයත් ඉහළ යන නිසා. ඒ වගේම සිරුර මත යෙදෙන පීඩනයත් ලැබෙන ප්‍රතිඵල කෙරෙහි සෘජුවම බලපෑම් කරන නිසා වැඩි පීඩනයක් යෙදිය හැකි, වැඩි බරකින් යුතු මෙවලමක් තෝරාගන්නත් සැලකිලිමත් විය යුතුයි. නමුත් මුහුණ සඳහා ඒතරම් ලොකු පීඩනයක් යෙදීමක් අවශ්‍ය නොවන නිසා සැහැල්ලු‍ මෙවලක් භාවිතා කරන්න පුලු‍වන්. ඔබේ අවශ්‍යතාවය හා පහසුව අනුවයි මෙය තීරණය කරන්න වෙන්නේ. ඒ වගේම දීර්ඝ කාලයක් භාවිතා කෙරෙන නිසා කල්පවතින නිමාවෙන් යුතු මෙවලමක් වීමත් වැදගත්.
ගුවාෂා මෙවලම් වර්ග ‘බයන්’ (ඊස්බ ීඑදබැ) යනුවෙන් හැඳින්වෙන විශේෂිත ගල් වර්ගයෙන් නිමවූ ගුවාෂා මෙවලම් තමයි අතිධ්වනි තරංග නිපදවීමේ වැඩිම හැකියාවෙන් යුතු මෙවලම් විදිහට සැලකෙන්නේ. ගුවාෂා සත්කාරයේ පුරෝගාමීන් වන ඉපැරණි චීන වෙදැදුරන් විසින් භාවිතා කළ ගුවාෂා මෙවලම් පවා තනා තිබුණේ මේ කියන පාෂාණ වර්ගයෙනුයි. නමුත් මේවා එතරම් සුලබව නැති නිසා ඊට බෙහෙවින් සමාන යැයි සැලකෙන මීහරක් අඟෙන් තැනූ ගුවාෂා මෙවලමක් වුණත් භාවිතා කළ හැකියි. සම්ප්‍රදායික චීන වෛද්‍ය විද්‍යාවට අනුව ‘කටුක ගුණාංගවලින්’ සමන්විත යැයි සැලකෙන මීහරක් අඟින් තැනු ගුවාෂා මෙවලම්වලින් සිදුකරන චිකිත්සාවේදි සිරුරේ ‘චී’ ශක්තියේ ගමනාග මනය ක්‍රමවත් කරමින්, හානිකර විෂ සංඝටක සිරුරින් ඉවත්කිරීමක් සිදුවන බව පිළිගැනෙනවා. මීට අමතරව ජේඞ්, රෝස තිරිවානා මෙන්ම මෑත භාගයේදී මල නොකන වානේවලින් තැනූ ගුවාෂා මෙවලම්ද භාවිතයට පැමිණ ඇති බවක් පෙනෙන්කට තිබෙනවා. ජේඞ් පාෂාණවල සිරුරේ ඇති ‘චී’ ශක්තියට බෙහෙවින් සමාන ශක්තියක් ගැබ්ව ඇති බවට විශ්වාසයක් චීන ජාතිකයන් අතර පවතින නිසා, සුවකිරීමේ හැකියාවැති පාෂාණ
විශේෂයක් ලෙසයි ජේඞ් සැලකෙන්නේ. රෝස තිරිවානා මගින් සිරුරේ ‘හෘද චක්‍රය’ විවෘත කිරීමක් සිදුවෙන බව විශ්වාස කෙරෙනවා. එමෙන්ම වානේවලින් තැනූ ගුවාෂා මෙවලම් යොදාගැනීම අතිශයින්ම ජනප්‍රියවෙලා තිබෙන්නේ ‘මෙවලම් ආධාරිත මෘදුපටක සංචලනය’ නැමැති ගුවාෂා චිකිත්සාව සඳහායි. මේ කියපු මෙවලම් තරම් සාර්ථක නොවුනත්, දැන් දැන් භාවිතයේ පහසුව නිසාවෙන් ප්ලාස්ටික් ගුවාෂා මෙවලම්ද කරළියට පැමිණිලා තියෙනවා.
කොහොමද මේ ගුවාෂා මෙවලමක් භාවිතා කරන්නේ ? නිවැරදි පිළිවෙළට සම්බාහන ක්‍රියාවලිය සිදුකිරීම මෙහිදී ඉතාම වැදගත් වෙනවා. මේ සඳහා මුලින්ම මුහුණ හොඳින් පිරිසිදු කොටගෙන, ක්‍රීම් හෝ ජෙල් වර්ගයක් ආලේපකර දෑතින් සම්බාහනය කරන්න. ඉන්පසුව ගුවාෂා මෙවලම මෘදු ලෙස, ‘තෙවන ඇස’ ලෙස හැඳින්වෙන ඇහිබැම දෙක අතර පිහිටි ප්‍රදේශයේ මැද සිට ඉහළට ගෙන යන්න. මෙය පස්වරක් කිරීමෙන් පසු නළල මැද සිට පටන්ගනිමින් කන් දෙක දක්වාත්, ඇහිබැමට යටින් පිහිටි අස්ථිමය ප්‍රදේශයත්, ඇස් යටත්, කම්මුල්, නිකට, මුව වටා පිහිටි ප්‍රදේශය, නිකට හා බෙල්ලත් මෙයාකාරයටම සම්බාහනය කළ යුතුයි. මේ සෑම සම්බාහනයක්ම අදාළ ප්‍රදේශයේ මැදින් පටන්ගෙන මුහුණෙන් ඉවතට ඇදී යන ආකාරයටයි සිදුකල යුත්තේ. සෑම සම්බහානයක්ම පස්වාරයක් බැගින් සිදුකිරීම ප්‍රමාණවත්. මින් ඉතාම සාර්ථක ප්‍රතිඵල ලබාගත හැකියි. 100% ක්ම ස්වභාවික චිකිත්සාවක් නිසා කිසිදු අතුරු ආබාධයක් ඇතිවෙන්නෙත් නැහැ.
රුක්ලන්ති පෙරේරා

සාමාන්‍යයෙන් බොහොමයක් දෙනා අතර තිබෙන මතයක් තමයි ප්‍රමාණයෙන් විශාල (ප්ලස් සයිස්) සිරුරක් හිමි අයට නිරූපණ ක්ෂේත්‍රයේ රැකියාවක් කියන්නේ සැබෑ කරගත නොහැකි සිහිනයක් කියන කාරණය. නමුත් ඒ මතය බැහැර කරන්න කාලය ඇවිත්. සිරුරේ ප්‍රමාණය නිසා දිවි නසා ගන්න පවා උත්සාහ කළ නිරූපිකාවන් කීප දෙනෙක් පහුගිය දවසක බීබීසී සේවය ඔස්සේ හරි අමුතු කතාවක් කිව්වා.
මේ කතාවට කතා නායිකාවන් පස් දෙනෙක් ඉන්නවා. ඒ තමයි කයේලා, ඒනම්, ලීසා, නියෝමි සහ වැනේසා කියන නිරූපිකාවන් පස් දෙනා. ඔවුන් තම තමන්ගේ කතාව මේ විදියට කිව්වා. ඉස්සෙල්ලාම කතා කළේ නියෝමි. “පුංචි කාලෙ මගේ හිතේ තිබුණු පිස්සුවක් තමයි නිරූපිකාවක් වීම. ඒත් මගේ විශාල සිරුර එයට බාධාවක් වුණා. අපේ පරම්පරාවෙ හැමෝම විශාල සිරුරු තියන අය. කොච්චර උත්සාහා කළත් මට ඒක අඩු කර ගන්න පුළුවන් වුණේ නැහැ. මගේ යාළුවො මගේ ශරීර ප්‍රමාණය ගැන කරන විහිළු අහගෙන ඉන්න බැරුව ගිය තැන අවුරුදු 16 දි මම දිවි හානි කර ගන්න හැදුවා. දවසක් මම දැක්කා සඟරාවක කවරයක මහත සිරුරක් තියන තරුණියකගේ පිංතූරයක් දාලා තියනවා. ඒ වෙලාවෙ මට හිතුණා මටත් සඟරා කවරයක ඉන්න තියනවා නම් කියලා. මම පුළුවන් තරම් ලස්සනට ඇඳලා සඟරා කතුවරුන් 20 දෙනෙකුට වඩා හමු වෙන්න ගියා. කවුරුවත් මට අවස්ථාවක් දුන්නේ නැහැ. සමහරු පුදුමයෙන් වගේ මම දිහා බලලා අමුතු විදියට හිනා වුණා. හරියට ඔය පර්වතයක් වගේ ඇඟකට සඟරාවක ඉඩක් දෙන්නේ කොහොමද කියනවා වගේ.”
ඊළඟට වැනේසාගේ කතාව. “ලොකු සිරුරක් තියන්නේ සතුටින් ඉන්න අයට කියනවානෙ. ඒත් එහෙම කෙනෙක්ගෙන් අහන්න ඕනෙ එයාගේ සතුට ගැන. මම කවදාවත් මගේ ඇඟ ගැන සතුටු වෙලා නැහැ. වෙළඳ දැන්වීම් නිෂ්පාදන ආයතන 10 කට වඩා මාව ඉන්ටවීව් කරලා ස්ක්‍රීන් ෂොට් අරගෙන මාව රිජෙක්ට් කළා. ඔවුන් කිව්වේ මගේ මුහුණ ලස්සන වුණත් ඇඟ අවුල් කියලා. කිසිම කෙනෙක් විශාල සිරුරක් තියන අයට කිසිම අවස්ථාවක් දෙන්න කැමති නැහැ. හැමෝම හිතන්නේ විශාල සිරුරක් කියන්නේ අසූචි ගොඩක් කියලයි.”
ඒනම්ට තියෙන්නේ වෙනස් විදියේ කතාවක්. “මගේ සිරුර ගැන මට වඩා මහන්සි වුණේ මගේ අම්මා. ඇය මාව ජිම් තුනකට යැව්වා. ඒත් කවදාවත් එකම එක රාත්තලකින්වත් මගේ බර අඩු වුණේ නැහැ. ඒ ගැන ඇය හිටියේ දුකින්. ඊට පස්සේ ඇය මට දෙන කෑම වෙනස් කළා. පළතුරු විතරයි රෑට. මහ රෑ මැද මම බඩගිනි වෙලා හොරෙන් ගිහින් ෆ්‍රිජ් එක ඇරලා කෑම කනවා කියලා දැනගෙන ෆ්‍රිජ් එක ලොක් කරලා යතුර හැංගුවා. මම බඩගින්න වැඩිකමට මහ රෑ යාළුවන්ගේ ගෙවල්වල ගිහින් කෑම කාලා තියනවා.”
විශාල ශරීරයෙන් පීඩා විඳපු කයේලා මෙහෙම කියනවා. “පුංචි කාලෙ යාළුවො කරන සමහර සෙල්ලම් මට කරන්න බෑ. මොකද මට හයියෙන් දුවගන්නවත් බෑ. ඉක්මණට මහන්සි දැනෙනවා. ඉතින් යාළුවො මාව සෙල්ලම් කරන්න ගන්නේ නෑ. මගේ ආසාව වුණේ හොඳට මේක් අප් කරලා යන්න පුළුවන් විදියේ ජොබ් එක්ක කරන්නයි. මේක් අප් කරලා ලස්සනට ඇඳලා වැඩට යන්න මම හීන මැව්වා. මට ගැලපෙනම ජොබ් එක නිරූපිකාවක් වීම. කොච්චර අයදුම්පත් දැම්මත් කිසිම කෙනෙක් මාව මොඞ්ල් බෑන්ක්වලට බඳවා ගත්තේ නැහැ.”
මේ විදියට තමන්ගේ සිරුර ගැන කනගාටුවෙන් හිටපු මේ අය සමාජ මාධ්‍ය ඔස්සේ එකට එකතු වෙලා සංවිධානයක් පිහිටුවා ගත්තා. ඒකෙ නම ඔයැ ඉදාහ චදිසඑසඩසඑහ පදඩැපැබඑග මේ සංවිධානය මගින් ලෝකයේ හැමතැනම ඉන්න ප්ලස් සයිස් සිරුරු තියන අයව එකතු කරලා ඔවුන්ගේ ප්‍රශ්න කතා කරනවා. උයහ සි පහ ඉදාහ බදඑ සපචදරඒබඑරෑ කියන මාතෘතාව යටතේ ඔවුන් සිදුකළ ව්‍යාපෘතියෙන් පස්සේ මේ සංවිධානයේ ඉන්න අයට විවිධ ක්ෂේත්‍රවල රැකියා විශාල ප්‍රමාණයක් සඳහා දොරවල් විවෘත වුණා. ඒ අතරින් නිරූපණ ක්ෂේත්‍රයේ විතරක් නෙවෙයි ගුවන් සේවිකාවන්, රංගන ශිල්පිණියන්, නර්තන ශිල්පිණියන් වගේම තරු පන්තියේ හෝටල් ක්ෂේත්‍රයේත් ඔවුන්ට රැකියා ලැබෙන්න පටන් ගත්තා කියලා ඔවුන් කියනවා.

මේ අතරින් විශේෂ වෙන්නේ නිරූපණ ක්ෂේත්‍රය. මොකද සිහින් සිරුරක් තියන අයට වගේම ප්ලස් සයිස් සිරුරක් තියන අයටත් හැඩට වැඩට ඇඳුම් අඳින්න පුළුවන් කියලා පෙන්වන්න මේ අය නිසා පුළුවන්. විලාසිතා ක්ෂේත්‍රයේ බොහොමයක් විලාසිතා නිර්මාණය වෙන්නේ සිහින් සිරුරක් තියන අයට. නමුත් දැන් ප්ලස් සයිස් අයටත් ලස්සන විලාසිතා නිර්මාණය වෙලා ප්ලස් සයිස් අයවම යොදාගෙන ඒ විලාසිතා නිරූපණය කරනවා. මේ නිසා ඒ වගේ විලාසිතාවලටත් මේ වෙද්දි ලොකු ඉල්ලුමක් ලැබෙමින් පවතිනවා.

ඒ අනුව ප්ලස් සයිස් විලාසිතාවලට වඩා වැඩි ඉල්ලුමක් මේ වෙද්දි ප්ලස් සයිස් නිරූපිකාවන්ට ලැබිලා. ඉස්සර ජිම් ගිහින් නොකා ඉඳලා කෙට්ටු වුණු නිරූපිකාවන් දැන් හොඳට කාලා ඇඟ මහත් කර ගන්න උත්සාහා කරන තත්වයට පත් වෙලා කියලා නියෝමි කියනවා. මොකද ප්ලස් සයිස් නිරූපිකාවන්ට ගෙවන මිලත් අනිත් නිරූපිකාවන්ට ගෙවන මිලට වඩා වැඩියි. ඒ නිසා කිසිම කාන්තාවක් තමන්ගේ ප්ලස් සයිස් සිරුර ගැන පොඞ්ඩක්වත් වද වෙන්න එපා කියලත් කවදාහරි දවසක ඒ අයට තමන්ගේ සිරුර ගැන ආඩම්බර වෙන්න අවස්ථාවක් ලැබෙනවා කියලත් ඇය තවදුරටත් කියනවා.

දුලංජලී මුතුවාඩිගේ

පාසල් යන දරුවෝ විෂය කරුණු මතක තබා ගැනීමේ උපක්‍රමයක් ලෙස භාවනා කරති. අධිරුධිර පීඩනය, හෘද රෝග ආදියෙන් පෙළෙන වැඩිහිටි රෝගීන්ට ද භාවනා කිරීම ඉතා යහපත් දෙයක් ලෙස වෛද්‍යවරු පවා උපදෙස් දෙති. තවත් අය තමන්ගේ යම් යම් පෞද්ගලික අභිමතාර්ථ ඉටුකර ගැනීම සඳහාත් භාවනාවෙහි යෙදෙනු දක්නට ලැබේ.
මේ අනුව බලන විට භාවනාවෙහි යෙදෙන හැම දෙනාටම ඇත්තේ, ඒ හා බැඳුණු බලාපොරොත්තු හා ප්‍රාර්ථනාවන්ය. එයින් පැහැදිලි වන්නේ, භාවනා කරන බොහෝ දෙනා එහි මූලික හරය හඳුනා ගෙන නැති බවයි.
බෞද්ධ භාවනාවේ මූලික හරය කුමක්ද? ඒවා නම් සිත පිරිසිදු කිරීම, ශෝක පරිදේවයන් දුරු කිරීම, සත්‍ය අවබෝධය සහ ඉහත කී සියල්ලෙහි අවසන් ප්‍රතිඵලය වන නිවන සාක්‍ෂාත් කර ගැනීමය.
නමුත් නිවන සාක්‍ෂාත් කර ගැනීම පසෙකලා බොහෝ දෙනෙකු භාවනා කරන්නේ ඉහත කී පරිදි ලෞකික පරමාර්ථ මුදුන්පත් කර ගැනීම උදෙසාය. සුළු මානසික කම්පනයක් ඇති වුවත් ඉන් මිදීම සඳහා බොහෝ දෙනා භාවනා කරන්නට පෙළඹෙන්නේ මේ නිසාය.
එක අතකට මෙහි වරදක් නැත. නමුත් ඒ වෙනුවෙන්ම සිතා භාවනා කරන්නට අවශ්‍ය වන්නේද නැත. මෙය තවත් පැහැදිලි කර ගන්නට අපි උදාහරණයක් ගනිමු. බත් පිඟානක් කන තැනැත්තෙකු “මගේ කුස පිරේවා පිරේවා” ආදී වශයෙන් ප්‍රාර්ථනා කිරීම අවශ්‍ය නොවේ. ඔහු බත් කන නිසා එසේ ප්‍රාර්ථනා කළත් නැතත් කුස පිරීම සිදුවෙයි. එමෙන්ම භාවනාව නිසි ලෙස කරන විට යහපත් ප්‍රතිඵල ඉබේම අත්වනු ඇත.
සිත පිරිසිදු වීම, ලෙඩ රෝග සුවවීම, විභාග සමත් වීම සඳහා මනස නිරවුල්ව පවත්වා ගැනීම, පෞරුෂ වර්ධනය, එදිනෙදා ජීවිතයේ දියුණුව සැනසුම යන මේ ඕනෑම දෙයක් වෙනුවෙන් භාවනා කිරීම සෘජුව ප්‍රතික්‍ෂේප කළ නොහැකි වන්නේ භාවනාවෙන් කුසල සිතිවිලි වැඩෙන නිසාය. නමුත් ලෞකික ප්‍රතිඵල අපේක්‍ෂාවෙන් පමණක් කරන භාවනාව බුදු දහමින් අනුමත නොවේ. ඊට හේතුව, එමගින් තන්හාව වැඩි වීමය. නිදසුනක් ලෙස ඔබ රූමත් වන්නට සිතා ගෙන දිනපතා භාවනාවේ යෙදෙන්නේ යැයි සිතමු. එයින් සිදුවන්නේ, ලස්සන වීමේ ඇල්ම දවසින් දවසම ඔබ තුළ වැඩි වීමය. එසේම, ඔබ බලාපොරොත්තු වන කාලසීමාවේදී ඔබ ලස්සන නොවුණොත් ඔබ තුළ ඉතිරි වන්නේ දුක, කළකිරීම හා පසුතැවිල්ලයි. භාවනාවේ අදහස ලස්සන වීම නිසා, එතැන ඇත්තේ ආශාව නමැති අකුසල සිතිවිල්ලයි. එවිට භාවනාවෙන් නිසි ප්‍රතිඵල ලැබීම අසීරු වෙයි.
පාඩම් මතක තබා ගැනීමේ අරමුණින් භාවනා කිරීමත් මෙවැන්නකි. එහිදී භාවනා කරන්නේ එමගින් බලාපොරොත්තු වන ප්‍රතිඵලය කෙරෙහිම සිත දැඩිව බැඳ තබමිනි. ඒ අනුව ලෝභ ආදී අකුසල කර්ම වැඩීම නොවැළැක්විය හැකිය. මෙහිදී මතකය වැඩි දියුණු කර ගන්නට භාවනා කිරීම වරදක් දැයි කෙනෙකුට විමසන්නට පුළුවන. එහි වරදක් නැත. නමුත් අරමුණ විය යුත්තේ පාඩම් මතක තබා ගැනීම නොව, සිත පිරිසිදු වීමය. එලෙස සිතා භාවනා වැඩිය යුතුය. සිත පිරිසිදු වීමේ ප්‍රතිඵලයක් ලෙස ඉබේම මතක ශක්තිය දියුණු වනු ඇත.
රුධිර පීඩනය ආදී රෝග නිවාරණය වන්නට භාවනාවෙන් ලොකු පිටිවහලක් සැලසෙන බව ලෝකය පුරා දැන් පිළිගෙන තිබේ. භාවනාවෙන් සිදුවන්නේ සිත පිරිසිදු වීමය. එවිට ලේ ධාතුව ද පිරිසිදු වේ. ලේ ධාතුව පිරිසිදු වනවිට ප්‍රතිශක්තිකරණය වැඩි වනු ඇත. ප්‍රතිශක්තිකරණය වැඩි වීම තුළින් රෝගවල ශක්තිය හීන වෙයි. භාවනාව ලෙඩ සුවකරන ප්‍රබල ඖෂධයක් බඳු වුවත් බුදුරජාණන් වහන්සේ අගය කළේ භාවනාවෙන් මනස ලෙඩ කරන රෝගකාරක විෂබීජ වන කෙලෙස් දුරු කරගැනීමය. ලෝභ, ද්වේෂ, මෝහ වැනි කෙලෙස්වලින් පිරුණු විට රෝගී වන්නේ ඉබේමය. මේ රෝග කාරක විෂබීජ පළවා හැරියොත් බොහෝ රෝගවලින් මිදීමේ හැකියාව ලැබේ.

රාජකීය පණ්ඩිත,
ශාස්ත්‍රපති,
පූජ්‍ය තලල්ලේ චන්දකිත්ති හිමිපාණෝ අවධාරණය කරති

ඉන්දු පෙරේරා

වර්තමානයේ බොහොමයක් ආයතනවලට ඇතුළුවීමේදී නළලට සමීප කර තබන යම් උපකරණයක් මගින් ශරීර උෂ්ණත්වය මනින ආකාරයක් දකින්නට ලැබේ. සාමාන්‍යයෙන් අප දන්නා උෂ්ණත්වමානවලින් ශරීර උෂ්ණත්වය මැනීමේ දී එය විනාඩි කීපයක් රෝගියාගේ ශරීරයට ස්පර්ශ කර තැබිය යුතු නමුත් මෙකී උපකරණය රෝගියාගේ සිරුරේ ස්පර්ශ කිරීමකින් තොරව ඉතා අඩු කාලයකින් ශරීර උෂ්ණත්වය පිළිබඳ පාඨාංක ලබා දේ. මෙම උපකරණය මගින් කොතෙක් දුරට නිවැරදි පාඨාංක ලබා ගත හැකිද යන්න පිළිබඳව පුත්තලම් දිස්ත්‍රික් සෞඛ්‍යය සේවා අධ්‍යක්ෂ කාර්යාලයේ ප්‍රාදේශීය වෛද්‍ය සැපයුම් අංශයේ වෛද්‍ය දිනේජ් සුදර්ශන චන්ද්‍රසිරි මහතා පැහැදිලි කළේ මෙසේය.

වර්තමානයේ වගේ වසංගත තත්ත්වයකදී රසදිය උෂ්ණත්වයමානය භාවිත කිරීම යම් ආකාරයක අවදානම් තත්ත්වයක්. රසදිය උෂ්ණත්වමානයෙන් රෝගියෙකුගේ උෂ්ණත්වය මනිද්දී රෝගියා සහ උෂ්ණත්වය මනින පුද්ගලයා අතර ඇතිවන සම්බන්ධතාව වැඩියි. ඒ කියන්නේ වෛරස රෝගයක් නම් බෝ වීමේ ප්‍රවණතාව ඉතාම වැඩියි.”
ඒ නිසා රෝගියා ඍජුව ස්පර්ශ නොකර උෂ්ණත්වය මැනිය හැකි උපකරණයක අවශ්‍යතාව ඇති වුණා. එහි ප්‍රතිඵලයක් විදියට තමයි අද බහුලවම දකින්න ලැබෙන අධෝරක්ත උෂ්ණත්වමානය නිර්මාණය වෙන්නේ. මෙය 80 දශකයේ නිර්මාණය වුණත් පේටන්ට් බලපත්‍රය ලබාගෙන වෙළෙඳපොළට නිකුත් කරලා තියෙන්නේ 2002 අවුරුද්දේදියි. අයි ආර් උෂ්ණත්වමාන මිනිසා සඳහා විතරක් නෙවෙයි කාර්මික ක්ෂේත්‍රයේත් පාවිච්චි කරනවා.”
“අධෝරක්ත උෂ්ණත්වමාන වර්ග දෙකක් තිබෙනවා. එකක් තමයි අතේ තියාගෙන රෝගියාගේ නළලට සමීප කර උෂ්ණත්වය මනින අපි මේ දවස්වල දකින්න ලැබෙන වර්ගය. අනිත් එක එකතැනක සවි කර තැබිය හැකි Thermal scanner නමින් හඳුන්වන ගුවන්තොටුපළ, වරායවල සවි කර මගීන්ව ස්කෑන් කර උෂ්ණත්වය මනින එක.”

“මෙය භාවිතය ඉතාම පහසුයි. එය රෝගියාට ස්පර්ශ වෙන්නේ නැති නිසා මෙමගින් රෝගය බෝ වීමක් සිදු වෙන්නේ නැහැ. එය රෝගියාගේ සිට සෙන්ටිමීටර් 3ත් 5ත් අතර දුරකින් තබා උෂ්ණත්වය මනින්න පුළුවන්. නමුත් අනිත් උෂ්ණත්වමානවලින් පාඨාංක ලබාගන්න දිගු වෙලාවක් යනවා. නමුත් මෙය තත්පරයකට අඩු කාලයකදී පාඨාංක ලබා දෙනවා. ඒ වගේම අනිත් උෂ්ණත්වමාන වීදුරු නිසා ඕනෑම වෙලාවක බිඳෙන්න පුළුවන්. රසදිය උෂ්ණත්වමානයේ රසදිය විෂ වුණු අවස්ථා ඕනතරම් තිබෙනවා. මෙය අනිත් උෂ්ණත්වමාන වගේ රෝගියාගෙන් රෝගියාට පිරිසිදු කරන්න අවශ්‍ය වෙන්නේ නැහැ.”

“නමුත් විවිධ හේතු නිසා මෙහි පාඨාංක වෙනස් වෙන්න පුළුවන්. උදාහරණයක් විදියට පරිසර උෂ්ණත්වය සෙල්සියස් අංශක 40 ට වඩා වැඩි නම් අධෝරක්ත උෂ්ණත්වමානයෙන් නිවැරදි පාඨාංක ලබා ගන්න බැහැ. පරිසරයේ ආර්ද්‍රතාව සියයට 85 ට වඩා වැඩි නම් නිවැරදි පාඨාංක ලබා ගන්න බැහැ. මෙය ප්‍රබල විද්‍යුත් චුම්බක තරංග සහිත ප්‍රදේශයකදී නිවැරදි පාඨාංක ලබා දෙන්නේ නැහැ. ඒ කියන්නේ මොබයිල් ෆෝන් එක ළඟ තබාගෙන මෙයින් ලබා ගන්නා පාඨාංක නිවැරදි නැහැ. ඒ වගේම මෙහි තිබෙන සංවේදකය නිසා බිම වැටුණොත් ක්‍රියා විරහිත වෙන්න පුළුවන්. මේ වගේ හේතු නිසා අධෝරක්ත උෂ්ණත්වමාන නිෂ්පාදනයේදීම දෝෂ පරාසයක් විදියට සෙල්සියස් අංශක දෙක බැගින් ඉදිරියටත් පසුපසටත් ලැබෙන්න පුළුවන් කියලා නිෂ්පාදකයන් කියනවා. ඒ නිසා ඕනෑම කෙනෙකුගේ උෂ්ණත්වය දෙවතාවක් මැන පාඨාංක ලබා ගැනීම අනිවාර්ය වෙන්න ඕනේ.”

“අධෝරක්ත උෂ්ණත්වමානයෙන් උෂ්ණත්වය මැනීමේදී විශේෂයෙන් සැලකිලිමත් වෙන්න ඕන කරුණු කීපයක්ම තියෙනවා. පළමුවැන්න තමයි අධෝරක්ත උෂ්ණත්වමානයකින් ශරීර උෂ්ණත්වය මනින්න කලින් ඒකේ උපදෙස් පත්‍රිකාව කියවලා ඒ උෂ්ණත්වමනයට අදාළව උෂ්ණත්වය මැනිය යුතු ස්ථානය ගැන හරියට දැන ගන්න ඕනේ. සමහර විට නළල ඉදිරිපස වෙන්න පුළුවන්, නළලේ පැත්තකින් වෙන්න පුළුවන්. ඒ නිසා උපදෙස් පත්‍රිකාවේ සඳහන් ස්ථානය මැන පාඨාංක ලබාගත යුතුයි. දෙවැන්න නළලේ දහඩිය තිබීම, කෙස් ගස් වැටී තිබීම, හිස් ආවරණවලින් වැසී තිබීම කියන කරුණු ගැන සැලකිලිමත් වෙන්න ඕනේ. නළලට කෙළින්ම ඉර අව්ව වැටී නොතිබිය යුතුයි. වේගයෙන් දුවගෙන ආපු කෙනෙක්ගේ උෂ්ණත්වය මනිනවා නම් විනාඩි කීපයක් ඒ කෙනාව නිෂ්චලව තැබීමෙන් පස්සේ තමයි පාඨාංක ලබා ගත යුතු වන්නේ. අනිවාර්යයෙන්ම දෙවතාවක් පාඨාංක ලබා ගැනීමත් වැදගත්. ඒ වගේම අධෝරක්ත උෂ්ණත්වමානයකින් මාදිලි 3 ක් ඔස්සේ උෂ්ණත්වය මැන ගන්න පුළුවන්. ඒ තමයි Body mode  ශරීර උෂ්ණත්වය,Surface mode යම් පෘෂ්ඨයක උෂ්ණත්වය, Room mode පරිසරයේ උෂ්ණත්වය. මේ තුනෙන් ගැළපෙන(mode) මාදිලිය තෝරා උෂ්ණත්වය මැනීම වැදගත්.Body mode එකට දාලා පෘෂ්ඨයක උෂ්ණත්වය මැනීමෙන් හෝ Room mode එකේදී ශරීරයේ උෂ්ණත්වය මැනීමෙන් නිවැරදි පාඨාංක ලැබෙන්නේ නැහැ.

දුලංජලී මුතුවාඩිගේ

කෙස් ඉම එහෙමත් නැතිනම් කෙස්වැටිය හා නළල එකිනෙක හමුවන ස්ථානයේ කෙස් අඩුවී, ගැලවීගොස් නළල පෑදෙන්නට පටන් ගැනීම වර්තමානයේ බොහෝ කාන්තාවන් මුහුණදෙන සුලබම ගැටලු‍වක් වී අවසන්. කෙස් අඩුවීම ගැන මුල්ම අනතුරු ඇඟවීම කාන්තාවන්ට ලැබෙන්නෙත් මේ කියන නළල පෑදීම කියන තත්ත්වයත් සමගයි. පහසුවෙන්ම කාගෙත් ඇසට හසුවන මෙම අසහනකාරී තත්ත්වය, ඇලෝපීෂියා කියන කෙස් අහිමි වීමේ රෝගී තත්ත්වයේම එක් ආකාරයක් කියලා වැඩිදෙනෙක් දන්නේ නැතුවත් ඇති. මේ තත්ත්වයට ගොදුරු වෙන්නට පටන් ගත්තට පස්සේ ස්ථිර විසඳුමක් හෝ ප්‍රතිකර්මයක් නැතිවුණත් මේ අසහනකාරී තත්ත්වය සැලකිය යුතු මට්ටමකින් පාලනය කරගන්න බැරිකමක් නැහැ. ජානමය සාධක නිසාත් කෙස්ඉම පසුපසට යාම කියන තත්ත්වය හටගන්න ඉඩ තිබුණත්, හුඟක් වෙලාවට මේ කියන තත්ත්වයට හේතුවෙන්නේ කාන්තා අපේම දුර්වලකම්. එවැනි දුර්වලකම් මඟහරවා ගැනීමෙන් මේ තත්ත්වයෙන් වැළකී ඉන්න ඔබට උදව්වක් වේවි මේ ලිපිය.

කෙස් ඉම පසුපසට යන්නේ ඇයි ?

කෙස් ඉම හා නළල හමුවන ස්ථානයේ කෙස් හැලීමෙන් පසු සාමාන්‍යයෙන් සිදුවන ආකාරයට යළි කෙස් නොවැඩීම නිසා, නළල මුදුනින් වගේම දෙපසිනුත් හිසේ සම මතුවී පෙනෙන්නට ගැනීම තමයි මේ තත්ත්වයට මුල්වෙන්නේ. මේ තත්ත්වය ඇතිවෙන්නේ කොහොමද කියන එක නිවැරදිව අවබෝධ කරගන්න නම් කෙස්වල වර්ධන චක්‍රය ගැනත් කරුණු දැනගන්නම වෙනවා.

පළමු අවධිය – ඇනජන්

කෙස්ගස් වල කූපයෙන් කෙස්ගස පිටතට වැඩෙන්නට පටන්ගන්නා අවධිය වන මෙහිදී කෙස් ගසේ වර්ධනය අඛණ්ඩව සිදුවෙනවා. කෙස්ගස දිගින් වැඩිවෙන මේ කාලය සාමාන්‍යයෙන් වසර 2 – 6 ත් අතර කාලයකට විහිදෙනවා.

දෙවන අවධිය – කැටාජන්

කෙස්ගස් විවේක ගැනීමට පෙර සූදානම්වන මේ කාලය සති දෙකක් පමණ විය හැකියි.

තෙවන අවධිය – ටෙලොජන්

කෙස්ගස් විවේක ගන්නා මේ කාලයේදී කෙස්ගසේ වර්ධනය සම්පූර්ණයෙන්ම නවතිනවා. ක්‍රමයෙන් ගිලිහී වැටෙන කෙස්ගස වෙනුවට නව කෙස්ගසක් වර්ධනය වීමට ඉඩ සැලසෙන්නේ මේ කාලයේදීයි. සාමාන්‍යයෙන් සති 5 – 6 ත් අතර කාලයක් මේ සඳහා වෙන්වෙනවා.

සිව්වන අවධිය – නියෝජෙන් හා එක්සෝජෙන්

නියෝජෙන් අවධියේදී සිදුවෙන්නේ ගිලිහී වැටුණු කෙස්ගස වෙනුවට නව කෙස්ගසක් පුනර්වර්ධනය වීමයි. සුපුරුදු ඇනජන් අවධියට පත්වීමට පෙර ගතකරන කෙටිකාලය එක්සෝජෙන් ලෙස හැඳින්වෙනවා.

කෙස්ඉම පසුපසට යාමට හේතු මොනවාද ?

ඇලෝපීෂියා කියන ස්වයං ප්‍රතිශක්තිහානිකරණ රෝගී තත්ත්වය මෙයට ප්‍රධානම හේතුවක්. ආර්තවහරණයට ලක්වූ කාන්තාවන් පහසුවෙන් ගොදුරු විය හැකි මේ තත්ත්වයේදී සිදුවන්නේ ශරීරයේ ප්‍රතිශක්ති පද්ධතිය විසින් කෙස්ගස් ආක්‍රමණය කරමින් ඒවා හැලීයාමට පෙළඹවීමයි. ඊට අමතරව නව කෙස් වර්ධනයත් මින් අඩාල කෙරෙනවා. ජානමය සාධක නිසාත් ඇතිවිය හැකි ඇලෝපීෂියා තත්ත්වයේදී නළල මුදුනත වන කෙස් ඉම අඟල් පහක් පමණ පසුපසට යාමේ අවදානමක් තිබෙනවා.
කෙස්මුල් පවා ඇදෙන ආකාරයට විලාසිතා කිරීම, කෙස් වර්ණ ගැන්වීම, පර්ම් කිරීම හා ස්ටේ්‍රට්නින් කිරීම වැනි රසායනික ආශ්‍රිතව සිදුකරන විලාසිතාවන් නිසාත් මේ තත්ත්වය ඇතිවෙන්න ඉඩ තියෙනවා. ශීඝ්‍රයෙන් සිදුවන සිරුරේ බර අඩුවීම, මානසික හා ශාරීරික ආතතිය නිසා මුක්ත ඛණ්ඩක නිපදවීම බහුලව සිදුවීම, තයිරොක්සින් වැනි හෝමෝනවල වෙනස්කම්, කීමොතෙරපි වැනි ඇතැම් ඖෂධමය ප්‍රතිකාර නිසාත් නළල ආශ්‍රිතව කෙස්හැලී යාමෙන් හිසේ සම මතුවී පෙනෙන්නට හැකියි. යකඩ, ෆෝලික් අම්ලය, විටමින් සී වැනි කෙස්ගස්වල නීරෝගි වර්ධනයට ඇවැසි විටමින් හා ක්ෂුද්‍ර පෝෂකවල ඌනතාවනුත් මෙලෙස කෙස්ඉම පසුපසට යමින් නළල පෑදෙන්නට හේතුවෙනවා. අනෙක් වැදගත්ම කාරණය තමයි හිසේ අපිරිසිදුකම. වැඩිදෙනෙක් හිතුවේ නැතිවුණාට හිස හොඳින් සෝදා පිරිසිදුව තබා නොගැනීම නිසා කෙස් කූප අවහිර වීමෙන් කෙස් ගසේ වර්ධනයට ඇවැසි පෝෂක නොලැබී යාමත්, හැලෙන කෙස් වෙනුවට අලු‍තින් කෙස් වර්ධනය වීම වළක්වනවා. කෙස් ගසක සජීවී කොටස වන කූපය (ෆොලිකලය) පිහිටලා තිබෙන්නේ හිස්කබලේ නිසා එහි පිරිසිදුබවත්, නීරෝගිභාවයත් මතයි කෙස්වල වර්ධනය තීරණය වෙන්නේ.

කෙස් ඉම පසුපසට යාම වැළැක්වීමට නම්

මේ තත්ත්වය පටන්ගත්තට පස්සේ එය ස්ථිරවම නැවැත්වීමට ක්‍රමයක් නැතිවුණත්, හිස්කබල මතුවී පෙනීම වළක්වාගන්නට නම් කෙස් බද්ධ කිරීම වැනි ප්‍රතිකර්ම තිබෙනවා. ඉන් අහිමිවූ කෙස් නැවත ලැබෙනවා සේම නව කෙස්වල වර්ධනයත් උත්තේජනය කෙරෙනවා. නමුත් මෙය ඉතාම මිල අධික ප්‍රතිකාරයක්. නමුත් මේ තත්ත්වය අපේ මට්ටමින් අපිට පාලනය කරගන්න බැරිකමකුත් නැහැ. ඒ සඳහා වැදගත්ම දේ තමයි කෙස් සම්බන්ධයෙන් කරන කටයුතුවලදී හැකිතාක් මෘදුව, කෙස් මතට ආතතියක් එල්ල නොවන ආකාරයට ඒ කටයුතු සිදුකිරීම.
හිසකෙස් විලාසිතා කිරිමේදී කෙස්ගස්වල මුල ඇදෙන ආකාරයේ පෝනිටේල් වැනි විලාසිතා පුරුද්දක් විදියට නොකරන එක තමයි වඩාත්ම සුදුසු. කෙස් කළඹට හැකිතාක් නිදහසේ තිබෙන්න ඉඩ හරින්න. විශේෂයෙන්ම කෙස් තෙත්ව තිබියදී එයට අමතර සැලකිල්ලක් දැක්විය යුතුමයි. එවැනි අවස්ථාවක කෙස්ගසක් 70% ක් පමණ ඇදී තිබෙන නිසා පහසුවෙන්ම ඊට හානිවීමේ හැකියාව ඉහළයි. තෙත්ව තිබියදී කෙස් පීරිමෙන් වළකින තරමට වඩාත් කෙස්වල ආරක්ෂාව තහවුරු වේවි. කෙස් පිරීමට භාවිත කරන පනාවත් ඔබේ කෙස්වල ස්වභාවයට ඔබින පළලැති දැති සහිත එකක් වීම වැදගත්. තෙදිනකට වරක්වත් කෙස් හොඳින් සෝදා පිරිසිදුව තබාගැනීිමත්, පැරබන්, සල්ෆෙට් හා සිලිකන් වැනි හානිකර රසායනිකවලින් තොර නිෂ්පාදන පමණක් කෙස් සඳහා භාවිත කිරීමටත් මතක තබාගන්න. සතියකට වරක්වත් කෙස්වලට හොඳ පෝෂණයක් ලබාදීමට “ඩීප් කන්ඩිෂන්” සත්කාරයක් කිරීම මගිනුත් කෙස්වල වර්ධනය උත්තේජනය කළ හැකියි.

රුක්ලන්ති පෙරේරා

මෙරට කොරෝනා වසංගතයේ අවදානම තවමත් සම්පූර්ණයෙන්ම පහව ගිහින් නැහැ. නමුත් බොහෝ දෙනෙකුට ඒ ගැන අමතකව ඇති බවයි මේ වනවිට පෙනෙන්නට තිබෙන්නේ. එබැවින් කොරෝනා වසංගතය මෙලෙස නොතකා හැරීම සැබැවින්ම සුදුසුද? ලෝකය සහ ලංකාව තුළ මේ වනවිට කොරෝනා වසංගතයේ සැබෑම බලපෑම කෙබඳුද යනාදී කරුණු කාරණා ගැන කතාබහ කිරීමට මෙලෙස “රැජිනිය” සමඟ එකතු වූයේ රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ මහතායි.

කොරෝනා වසංගත තත්ත්වය තවමත් අප හැර ගිහින් නැහැ. මොකද මෙය ගෝලීය වසංගත තත්ත්වයක්. මේ වෙනකොට ලෝකයේ බොහෝ රටවල කොරෝනා දෙවැනි රැල්ලක් නිර්මාණය වෙමින් පවතිනවා. අපේ රටටත් එම තත්ත්වය බලපෑම් නොකරාවි කියලා අපට කියන්න බැහැ. මොකද අපි හුදෙකලා වුණු මිනිසුන් කොට්ඨාසයක් නෙමෙයි. ලෝකයේ අනෙකුත් රටවල් සමගින් ගනුදෙනු කරන්නට අපට සිදුවෙනවා. නොබෝ දිනකින් ගුවන්තොටුපළ විවෘත කිරීමත් සමග විදෙස් සංචාරකයන් මෙරටට පැමිණීමත් සමග යළි කොරෝනා උවදුර අප වෙත ළඟාවෙන්නත් බැරි කමක් නැහැ.
ඇත්තටම මේක මහජන සෞඛ්‍ය පිළිබඳ හදිසි තත්ත්වයක්. එනිසා ඉක්මන් ප්‍රතිචාර දැක්වීම බොහොම වැදගත්. කොහොම වුණත් රටක් විදියට අපට මෙම තත්ත්වය සාර්ථකව පාලනය කරන්නට හැකියාව ලැබුණා. රාජ්‍ය සහයෝගය, සෞඛ්‍ය අමාත්‍යාංශය, ආරක්ෂක අමාත්‍යාංශය වැනි අත්‍යවශ්‍ය සේවාවන්ගේ සහයෝගය වගේම ජනතා සහයෝගයත් උපරිමව ලැබුණු නිසා තමයි මේ තරම් අඩු කාලයකින් මෙම තත්ත්වය පාලනය කරගැනීමට හැකියාව ලැබුණේ.

අමතක වෙන්න දෙන්න එපා

යම් යම් අවස්ථාවලදී මහජන සහයෝගය අඩු වැඩි වෙන අන්දම පේනවා. මොකද මේ වෙනකොට ගොඩක් අයට කොරෝනා තත්ත්වයක් තිබුණාද කියලාවත් අමතක වෙලා. සාමාන්‍යයෙන් අමතක වීම ස්වාභාවිකයි. ඒත් අප පසුගිය කාලය ගෙවා දැමූ අන්දම, ලෝකයේ බොහෝ රටවල් අදටද පවතින තත්ත්වය අමතක වෙන්න දෙන්න එපා. මොකද මේ පිළිබඳව අවධානය අඩු වූ නිමේෂයක් පවා නැවතත් රෝගය සමාජය තුළ පැතිර යන්නට ප්‍රමාණවත්.
මේ වන විට කොරෝනා දෙවැනි රැල්ලක් ගැන ලෝක සෞඛ්‍ය සංවිධානය කතා කරනවා. ඔවුන් එම තත්ත්වය වළක්වා ගැනීමට අනුගමනය කළ යුතු ක්‍රියාමාර්ග පිළිබඳව පෙන්වා දෙනවා. එවන් මොහොතක මෙම වෛරසයත් සමඟින් ජීවත් වීමේදී අනුගමනය කළ යුතු මූලික කාරණා අමතක කර දමා අපට ඉදිරියට යන්න බැහැ.

තවදුරටත් සෞඛ්‍ය ආරක්ෂණ නීතී සමඟ

යම් හෙයකින් නැවත රෝගය පැතිරෙන්න ගත්තොත් රටක් විදියට හැමෝම එකතුව කරපු කැපවීමේ මහන්සිය අපතේ යනවා. ඒ නිසා තවදුරටත් සෞඛ්‍ය ආරක්ෂණ නීතීන් අනුව ජීවත් වීමට අප කටයුතු කිරීම අවශ්‍යයි. ඒ අනුව මීටරයක දුර පවත්වා ගැනීම, මුඛ ආවරණ පැළඳීම වගේම නිතර දෑත් පිරිසිදු කිරීම කියන කාරණා තවදුරටත් පවත්වාගෙන යෑම අවශ්‍යයි. ඒ දේවල් මේ රෝගය ලෝකයේ පවතින තාක් කල් අප සතුව පවත්වා ගැනීම වැදගත්.
ඒ සඳහා කොතෙක් කලක් ගතවෙයිද කියන කාරණාවට නිශ්චිත පිළිතුරක් දෙන්නට බැහැ. බොහෝදුරට වසරක් හෝ දෙකක් වෙන්න පුළුවන්. 1918 දී ඇති උණ ස්පාඤ්ඤ උණ කියන්නෙත් ලොව කැළඹූ මෙවැනිම වසංගත තත්ත්වයක්. එම තත්ත්වයත් වසර දෙකක් විතර කාලයක් පැවතුණා. ඒ අනුව කොරෝනා වෛරස තත්ත්වයත් ඒ තරම් කාලයක් අපත් සමඟින් ඉන්නට ඉඩ තියෙනවා.
පාසල් විවෘත වෙනවා… ගුවන් තොටුපළ ඇරෙනවා… රට තුළට විදේශිකයන් සංක්‍රමණය වෙනවා… ඒ අයට මඟ පෙන්වන්න වෙන්නේ අපේ රටේ ඉන්න මඟ පෙන්වන්නන්ටයි. ඉතින් මේ දේවල් එක්ක ආයෙමත් වතාවක් රට තුළට වෛරසය ඒමට තිබෙන අවදානම වැඩියි.

පාසල් ඇරඹුණු පසුව

පාසල් ආරම්භ වීම නිසා විශාල බලපෑමක් ප්‍රවාහන සේවාවෙන් මතුවෙන්න පුළුවන්. අපි හැමෝම දන්නවා අපේ දරුවන් ප්‍රවාහනය කරන වාහනවල පරතරයක් තබා ගැනීම අපහසු බව. ඒ විදියට සමාජගත වන දරුවා රෝග වාහකයෙක් විදියට ආපසු නිවසට එන්න පුළුවන්. ඒ අයගෙන් ගෙදර සිටින අයටත් රෝගය පැතිරෙන්න පුළුවන්.
කොහොමත් මේ වන විටත් පළාත් හතක අධ්‍යාපන බලධාරීන් වෙත නිවැරැදි උපදෙස් ලබා දීමට අධ්‍යාපන අමාත්‍යාංශය කටයුතු කර නොමැති බව වාර්තා වෙනවා. එය හොඳ දෙයක් නෙමෙයි. කොහොමත් අධ්‍යාපන අමාත්‍යාංශය සහ සෞඛ්‍ය අමාත්‍යාංශය එකතුව හරි යාන්ත්‍රණයක් දෙන්න ඕනේ. මේ දේවල් හරියට නියාමනය කිරීමේ වගකීම අධ්‍යාපන අමාත්‍යාංශය සතුයි. මේ දේවල් හරියට කළමනාකරණය නොවුණොත් ප්‍රායෝගික ගැටලු ගණනාවක් එන්න පුළුවන්.
පාසල් පද්ධතිය තුළ පැය ගණනාවක් මුඛ ආවරණ දමාගෙන උගන්වන්න අමාරුයි. කුඩා දරුවන්ට පැය ගාණක් මුඛ ආවරණ දමාගෙන ඉන්න පුළුවන්කමක් නැහැ. මේ වගේ තත්ත්වයන් නිවැරැදිව කළමනාකරණය නොකළොත් එය නැවත රෝගය පැතිර යාමට හේතුවක් වෙන්න පුළුවන්.

මැතිවරණයට පෙර හිතන්නට යමක්

මේ වෙලාවේ ගොඩක් අය හැමදේම අමතක කරලා මැතිවරණයට සූදානම් වෙනවා. මේ වෙලාවේ ඡන්දය පවත්වන එක නෙවෙයි ගැටලුවක් වෙන්නේ. ඒ සඳහා වන පෙර සූදානම. සෞඛ්‍ය ආරක්ෂිත ක්‍රමවේද අනුගමනය නොකර රැස්වීම් පවත්වනවා. ගෙයින් ගෙට යනවා. ඒක බොහොම අවදානම්. ආරක්ෂාකාරී පියවර අනුගමනය කරමින් මැතිවරණය පවත්වන්න පුළුවන්. ඒත් ඒ වෙනුවෙන් ජනතාව ඒකරාශි කරගෙන රැස්වීම් පැවැත්වීම ලොකු අවදානමක්. ඒ ගැන අවධානය යොමු වීම අවශ්‍යම කාරණයක්.

විදේශිකයන් ආවොත්

ගුවන් තොටුපළ විවෘත කිරීමත් සමඟින් විදෙස්ගත අය එනකොට ඒ අයත් එක්ක රෝගය එන්න පුළුවන්. රටට ඇතුළු වෙනකොටම ඡක්‍ඍ පරීක්ෂණයට ලක් කරලා ඒ අය එක් වරම රට තුළට ගැනීම අවදානම්. මොකද රෝග කාරක ශරීරගතව තිබී පසුව ආසාදනය වෙන්න පුළුවන්. එහෙම නම් රටට ඇතුළු වන විදේශිකයන් නිරෝධායන කාලයකින් පසුව තමයි රට තුළ සංචරණයට අවස්ථාව ලබා දෙන්නට සිදුවෙන්නේ. ඒ වගේ නිරෝධායන කාලයක් ගත කරන්නට සංචාරකයන් කැමැති වෙයිද? මේ වගේ ප්‍රායෝගික ගැටලු බොහොමයක් මතුවෙන්න පුළුවන්.
නමුත් අද වන විට ඕස්ට්‍රේලියාවේ වික්ටෝරියා ප්‍රාන්තයේ කොරෝනා දෙවැනි රැල්ලක් මතුවෙන්නට පටන් අරගෙන. ඒ අනුව රෝගීන් 50, 60 වාර්තා වෙන්න අරගෙන තියෙනවා. ඒ රට එවන් තත්ත්වකට පත්ව තිබෙන්නේ ගුවන් තොටුපළ සහ නිරෝධායන මධ්‍යස්ථාන හරියට කළමනාකරණය නොවීම නිසයි. අපේ රටටත් එහෙම වෙයි ද කියන තත්ත්වයත් එක්ක අප සැලකිලිමත්ව කටයුතු කිරීම වැදගත්.

අවදානම තවමත්

කොහොමත් සංචාරකයන්ට රට විවෘත කළාම ඒ අය නිරෝධායනයකින් තොරව ආවොත් රට තුළදී මතුවෙන්න ඉඩ තියෙනවා. ඒ අයට මඟ පෙන්වන අයගෙ ජීවිත අවදානම්. ඉතින් ඒ අයට කියන්න වෙන්නේ , මූලික සිද්ධාන්තවලින් බැහැර වෙන්න බෑ කියලා. ඒ අනුව මීටරයක පරතරය, මුව ආවරණ, දෑත් සේදීම අනුගමනය කරනවා වගේම සමීප සුහද ගනුදෙනු බැරි බවත් අමතක කරන්න එපා. හැබැයි ඒ තුළින් 100% ක්ම අවදානම බැහැර වෙන්නේ නැහැ. ඒ වුණත් රටේ ආර්ථිකය ගොඩ නගා ගන්නට නම් අපට මේ අපහසුතා සහ අවදානම මැදින් මේ ගමන යන්නම වෙනවා.

කවුරුන් හෝ අකර්මණ්‍ය වුණොත් නැවතත් වෛරසය අප අතරට එන්න පුළුවන්. කොහොමත් ලෝකයේ කොරෝනා රෝගීන් ඉන්න තුරු අපට ඒ අවදානම ගන්න වෙනවා. ඉතින් මේ ගෙවුණු කාලය වගේම ඉස්සරහට එන කාලයත් තවදුරටත් සෞඛ්‍ය ආරක්ෂණ පියවර අනුගමනය කරමින් ජීවත් වෙන්නම වෙනවා. හැබැයි ගෙවුණු කාලයට වඩා ඉස්සරහට එන කාලය අවදානම වැඩිවෙන්න පුළුවන්. මොකද ගෙවුණු කාලයේ අපි හිටියේ නිවෙස්වල. අද අප සමාජගත වෙලා. එදා රට වැහිලා. නමුත් ඉස්සරහට එන කාලය රට විදේශිකයන්ට විවෘත වෙලා. මේ දේවල් එක්ක බොහොමත් පරිස්සමින් යහපත් සෞඛ්‍ය පුරුදු සමගින් අපට ජීවත් වෙන්න සිදු වෙනවා.

උපදෙස්:
රජයේ වෛද්‍ය නිලධාරීන්ගේ සංගමය ලේකම් වෛද්‍ය
හරිත අලුත්ගේ

කල්හාරි දසනායක

අද කාලෙ බොහොමයක් තරුණියන් නිතරම මේක් අප් කරන්න පුරුදු වෙලා ඉන්නවා. සමහර විට දිවා කාලය පුරාම මේක් අප් සහිතව තමයි ඉන්නේ. ඉතින් මේක් අප් කරන්න කලින් ඔබ දැනගත යුතු වැදගත් ඉඟි කීපයක් මේක් අප් ටියුට්ස් වෙබ් සයිට් එක පෙන්වා දී තියෙන්නේ මෙහෙමයි.
1. පුංචි ඇස් ලොකු කර පෙන්වන හැටි
ලොකු ඇස් දෙකක් කියලා කියන්නේ තරුණියකට අමුතු ලස්සනක් එකතු කරන දෙයක්. නමුත් අපේ රටේ තරුණියන් ප්‍රමාණයෙන් කුඩා ඇස් ඇති අය මිස විශාල ඇස් ඇති අය නෙවෙයි. ඒ නිසා ඔවුන් ඇස් ලොකු කර පෙන්වන මේක් අප් එකක්ට කැමතියි. ඇස් දෙක මේක් අප් කරද්දි අයි ලයිනර් එක සුදු පාටින් මේක් අප් කරන්න. එතකොට ඇසේ සුදු ප්‍රදේශය සහ අයි ලයිනර් එකේ සුදු පැහැය එකට එක් වී පෙනෙන නිසා ඇස් දෙක ප්‍රමාණයෙන් විශාල වී පෙනෙනවා.
2. හරි ක්‍රමයට මස්කාරා ආලේප කරන හැටි
සාමාන්‍යයෙන් අපි මස්කාරා ආලේප කරද්දි එය සිදු කරන්නේ අපිට ඕනෙ වර්ණය එකපාරින්ම ආලේප කරන එකයි. නමුත් ඒ විදියට ආලේප කිරීමෙන් අපිට වුවමනා වර්ණය හරියටම ආලේප වෙන්නේ නැහැ. මස්කාරා ආලේප කරද්දි ඉස්සෙල්ලාම සුදු පැහැය ආලේප කරන්න. ඊට උඩින් තමයි ඔබට අවශ්‍ය කරන වර්ණය ආලේප කළ යුතු වන්නේ. එවිට ඒ වර්ණය ඉතා හොඳින් කැපී පෙනෙන ආකාරයට ආලේප වෙනවා.
3. කොණ්ඩය ඝනකමින් වැඩි කර පෙන්වන හැටි
කොණ්ඩය අඩුවෙන් තියන අයට තමයි මෙය වැදගත් වෙන්නේ. කොණ්ඩය බෙදා පීරුවාට පස්සේ හිස් කබලේ සුදු පැහැය වැඩිපුර පෙනෙනවා නම් ඒ කියන්නේ ඔබේ කොණ්ඩය අඩුයි කියන එකයි. ඒ වගේ වෙලාවට කරන්න තියන හොඳම දේ තමයි කළු පැහැති අයි ෂැඩෝ එක අරගෙන සුදු පැහැය වැඩිපුර පෙනෙන තැන්වල ආලේප කිරීම. ඉන් කොණ්ඩයේ වොලියුම් එක, ඒ කියන්නේ ප්‍රමාණය වැඩි ආකාරයක් පෙන්වන්න පුළුවන්.
4. තනිව මස්කාරා ආලේප කරන හැටි
මස්කාරා ආලේප කරද්දි සුළුවෙන් හෝ ඇහැ තුළට ගියොත් කඳුළු එන්න පටන් ගන්නවා. ඒ නිසා එය පරිස්සමින් කළ යුතු දෙයක්. ඇස් තුළට යන්නේ නැතිව, ඇහැ වටා වදින්නෙත් නැතිව මස්කාරා ආලේප කරන්න ඔබට පුංචි හැන්දක් පාවිච්චි කරන්න පුළුවන්. රූපයේ ආකාරයට හැන්ද ඇහැ යටින් තියලා එය මතින් මස්කාරා ආලේප කිරීමෙන් ඇහැ තුළට යන්නේ හෝ ඇහැ අවට ආලේප වන්නේ හෝ නැහැ.
5. අයි ෂැඩෝ ලිප්ස්ටික් බවට පත් කරන හැටි
ලිප්ස්ටික් එක ඉවර වුණු වෙලාවට අයි ෂැඩෝස් ලිප්ස්ටික් බවට පත් කර ගන්න පුළුවන් කියලා ඔබ දන්නවාද? ඒක කරන්නේ මෙහෙමයි. අයි ෂැඩෝස් ටිකක් අරගෙන ඒකට බොඩි ලෝෂන් ඉතාම ස්වල්පයක් එකතු කරලා හොඳින් මිශ්‍ර කරන්න. දැන් මේ මිශ්‍රණය ලිප්ස්ටික් ආකාරයට දෙතොලේ ආලේප කරන්න පුළුවන්.
6. ස්වභාවික බොඩි ස්ක්‍රබ් සාදා ගන්නා හැටි
බොඩි ස්ක්‍රබ්වලින් කරන්නේ සම මත ඇති මැරුණු සෛල ඉවත් කිරීම. මේ සඳහා වෙළඳ පොලේ තිබෙන කෘත්‍රිම දේවල් පාවිච්චි කරන්නේ නැතිව ස්වභාවික බොඩි ස්ක්‍රබ් එකක් පාවිච්චි කරන්න ඔබත් කැමති ඇති. ලෝකෙ තියන හොඳම බොඩි ස්ක්‍රබ් එක තමයි කෝපි කුඩු. කෝපි කුඩු ටිකක් අරගෙන වතුර බිඳු දෙක තුනක් දාලා හොඳින් ස්ක්‍රබ් කරන්න. පළමු අවස්ථාවේ සිටම පැහැදිලි වෙනසක් දකින්න පුළුවන් වේවි. ඒ වගේම ඔබට කෝපි ඇට බ්ලෙන්ඩර් එකේ දමා කුඩු කරගෙන කෝපි කුඩු සාදා ගන්න පුළුවන් නම් ප්‍රතිඵලය තවත් සාර්ථක කර ගන්න පුළුවන්.
7.වියළුණු මස්කාරා එකක් යළි සකස් කර ගන්නා හැටි
මස්කාරා එක ආලේප කරන්න බැරි තරමයම වියළිලා නම් පුංචි උපක්‍රමයක් මගින් එය යථා තත්වයට පත් කර ගන්න පුළුවන්. ඔබට කරන්න තියෙන්නේ මස්කාරා එක තුළට ජොජෝබා ඔයිල්, ඔලිව් ඔයිල් වැනි තෙල් වර්ගයකින් බිඳුවක් දෙකක් එකතු කරන එකයි. ඒ දෙකම සපයා ගන්න බැරි නම් පිරිසිදු පොල් තෙල් බිඳුවක් එකතු කරන්න. නැවතත් මස්කාරා එක පාවිච්චි කරන්න පුළුවන් වේවි.
ප්‍රතිභා රත්නසූරිය

ඉන්දියාව සහ පාකිස්තානය අතර පවතින සීතල යුද්ධය අවසන් කරන්න පුළුවන් වෙන්නේ යුධමය විසඳුමකින් විතරයි කියලා පහුගිය දවසක ඇමෙරිකානු ජනපති ඩොනල්ඞ් ට්‍රම්ප් ප්‍රකාශ කරලා තිබුණා. මේ ප්‍රකාශය ගැන පාකිස්ථාන අගමැති ඉම්රාන් ඛාන් තමන්ගේ විරෝධය පළ කරමින් ට්විටර් සටහනක් තැබුවේ ඉන්දියාව සහ පාකිස්ථානය අතර යුද්ධයක් ඇති නොවන බවට ප්‍රකාශ කරමිනුයි. මේ ගැන CNBC International TV ජාත්‍යන්තර නාලිකාව ඉම්රාන් ඛාන් සමග සංවාදයක් සිදු කරනු ලැබුවා.
මේ රටවල් දෙක අතර සීතල යුද්ධයක් පවතින්නේ නැහැ කියලද ඔබ කියන්නේ?
සෑම රටක් අතරම වගේ ඉන්දියාව සහ අපි අතර යම් යම් කරුණු ගැන මතභේද පවතිනවා. ඒකට සීතල යුද්ධයක් කියනවා නම් ලෝකයේ හැම රටක් අතරම සීතල යුද්ධක් පවතිනවා කියලා මට කියන්න වෙනවා.
ට්‍රම්ප් ජනපති යුධමය විසඳුමකින් බලාපොරොත්තු වෙන්නේ මොකක් කියලද ඔබ හිතන්නේ?
ඒක දන්නේ ඔහුම විතරයි. නමුත් ඇමෙරිකාවට පාකිස්ථානය එක්ක පවතින අමනාපකම් නිසා ඔවුන් කැමති ඇති යුද්ධයක් ඇති වෙනවා නම්. ඉන් ඔවුන්ට අත් වෙන වාසිය ඉතාම විශාලයි.
මොනවගේ වාසි ගැනද ඔබ කියන්නේ?
මම හිතන්නේ මම මේ ගැන කතා කළ යුතු නැහැ කියලයි. මොකද ඉන්දියාව සහ අපි අතර යුද්ධය කවදාවත් සිදු නොවන දෙයක්. ඉතින් එහෙම දෙයක් වෙනකන් බලාගෙන ඉන්න අයට පිළිතුරු දෙන්න අවශ්‍යයි කියලා මට හිතෙන්නේ නැහැ.
ඔබට ඇමෙරිකාව එක්ක තරහක් තියනවා ද?
තරහක් තියාගෙන හිටියා කියලා මට ඇතිවෙන දේකුත් නැහැ නැතිවෙන දේකුත් නැහැ. ඒ නිසා එහෙම දෙයක් නැහැ. නමුත් ඇමෙරිකානු රජයේ සමහර තීරණ ගැන කිසිසේත්ම පැහැදීමක් නැහැ.
ඇමෙරිකානු තරුණියක් ඔබේ බිරිඳ වෙලා හිටපු කාලයකුත් තිබුණා.
ඒක මේ ප්‍රශ්නයට අදාල කාරණයක් නෙවෙයි. ආදරයක් ඇති වීම සහ විවාහ වීම කියන කාරණාවලදි මට ජාතිය, ආගම, වයස, කුලය වගේ දේවල් අදාල වෙන්නේම නැහැ.
ඒ නිසා ද ඔබේ හිටපු බිරියන්ගෙන් වැඩි දෙනෙකු සහ ඔබ අතර පරතරය අවුරුදු 20 කටත් වඩා වැඩි වුණේ?
ඒ ගැන නම් විවේකීව ඉන්න වෙලාවක හිතලා බලන්න ඕනෙ. මගේ පළමු බිරිඳ සහ වර්මාන බිරිඳ දෙදෙනා නම් මට වඩා අවුරුදු විසි ගණන්වලින් ළාබාලයි. අනිත් අය ගැන මට ඔබට තරම් මතකයක් නැහැ.
ඇයි ඔබේ වර්තමාන බිරිඳ මාධ්‍ය ඉදිරියට ඒම ප්‍රතික්ෂේප කරන්නේ?
ඒක ඇය හැදුණු වැඩුණු පරිසරය නිසා සිදුවුණු දෙයක්. ඔබ දන්නවා ඇති සාම්ප්‍රදායික පාකිස්ථාන් තරුණියන් ප්‍රසිද්ධියට කැමති අය නෙවෙයි. ඒ නිසා ඇය වැඩිපුර මාධ්‍ය ඉදිරියට එන්නේ නැහැ. මම ඇගේ කැමැත්තට අකමැත්ත ප්‍රකාශ කරන්නෙත් නැහැ.
මාධ්‍යවල සඳහන්වන විදියට ඔබ දෙදෙනා අතර හිතවත්කම ඇති වෙන්නේ ඇගේ පළමු විවාහය අතරතුරමයි. ඇයට අවුරුදු 30 ක විවාහය අත්හැර ඔබ සමග විවාහ වෙන්න තරම් ඔබේ තිබෙන විශේෂත්වය මොකක්ද?
ඒ ගැන නම් අහන්න ඕනෙ ඇගෙන්මයි. නමුත් මට එක දෙයක් කියන්න ඕනෙ. ඇගේ ඒ තීරණයට හේතුව මගේ අගමැතිකම නම් නෙවෙයි. මොකද අපේ විවාහය සිදු වෙලා මාස 6 ක් ගියාට පස්සේ තමයි මම අගමැති බවට පත් වෙන්නේ.
නිළියන්, ජන මාධ්‍යවේදිනියන්, නිවේදිකාවන්, නිරූපිකාවන්, දේශපාලඥවරියන්, නීතිඥවරියන් ආදී විවිධ වෘත්තිකයින් ඔබේ බිරියන් වෙලා හිටියා. බිරියකට ගැලපෙනම වෘත්තිය මොකක් කියලද ඔබට හිතෙන්නේ?
ඒක තීරණය වෙන්නේ ඇයට ඇගේ වෘත්තිය සහ පෞද්ගලික ජීවිතය කියන දෙක කොයි තරම් දුරට සමබර කරගන්න පුළුවන් ද කියන කාරණය මත විතරයි. වෘත්තිය සහ ගෙදර පටලවා ගන්නේ නැතිනම් ඔය කියන ඕනෙම වෘත්තියක ඉන්න කෙනෙකුට හොඳ බිරියක් වෙලා සාර්ථක පවුල් ජීවිතයක් ගොඩ නගා ගන්න පුළුවන්.
දරුවන් පස් දෙනෙකුගේ අම්මා කෙනෙකුට නැවත් වරක් පෙම්වතියක් වෙන්න පුළුවන් ද?
ඒක මට විස්තර කරන්න දෙන්න. වයස අවුරුදු 16,18 කාලෙ අපි ආදරය කරන්නේ ලස්සනට. නමුත් දැන් අපි ආදරය කරන්නේ ලස්සනට වඩා ගතිගුණ ස්වභාවයට. ඇයට අවුරුදු 16 කාලෙ ඇය කාගේ හෝ පෙම්වතියක්ව සිටින්න ඇති. නමුත් ඇය මගේ පෙම්වතිය කාලෙ ඇයට ඉන්න දරුවො ගණනට වඩා මට වැදගත් වුණේ ඇයත් එක්ක ගත කරද්දි මගේ හිතට දැනෙන සහනය කොච්චරක් ද කියන එකයි. මම පීඩනයෙන් ඉන්න වෙලාවට ඇය හොඳ උපදේශකයෙක් වුණා. මම දුකෙන් ඉන්න වෙලාවට ඇය මට කුරානය වුණා. අද වෙද්දි ඇය මට හොඳ සහායිකාවක්, බිරිඳක් සහ මිතුරියක්.
ඔබ දෙදෙනාගේ අනාගතය මොන වගේ වෙයිද?
ඒ ගැන සැළසුම් නැහැ. දැනට මට තියෙන්නේ දේශපාලන ජීවිතයේ සැළසුම් විතරයි. පාකිස්ථාන දරුවන්ගේ අධ්‍යාපනය නගා සිටුවීම සහ සෞඛ්‍යය තත්වය යහපත් තත්වයට පත් කිරීම කියන කාරණා ප්‍රතිපත්තියක් කරගෙනයි මම මේ තැනට ආවේ. ඒවා ඉටු කිරීම තමයි දැන් මගේ සැළසුම වෙලා තියෙන්නේ.
ඔය කියන දරුවන් අතර ඔබ දෙදෙනාගේ දරුවන්ට ඉඩක් නැද්ද?
මොකද නැත්තේ? ඇයට දරුවන් පස් දෙනෙක් ඉන්නවා. ඔවුන්ගෙන් කීප දෙනෙක් විවාහ වෙලත් ඉන්නේ. මට දරුවන් තුන් දෙනෙක් ඉන්නවා. ඒ අය දැන් පාසල් අධ්‍යාපනය නිම කරලා උසස් අධ්‍යාපනයේ නිතර වෙනවා.
මම අදහස් කළේ ඔබ දෙදෙනාගේ දරුවන් ගැන? ඉම්රාන් ඛාන් සහස බුෂ්රා බිබි කියන දෙමාපියන්ගේ දරුවන් ගැන?
ඒ ගැන අපි තීරණයක් ගත්තු දාට අනිවාර්යයෙන්ම ඔබට කියන්නම්.


දරු සුරතල් වෙනුවට ද ඔබ සුරතල් සතුන් ඇති කරමින් ඔවුන්ගේ සුතරලය බලන්නේ?
මම කොහොමත් පුංචි කාලෙ ඉඳන් සුරතල් සතුන් විදියට බල්ලන් කීප දෙනෙකු ඇති කළා. ඒ පුරුද්ද අදටත් තියනවා. මගේ ගෙදර ඉන්නවා බල්ලන් පස් දෙනෙක්. ඇත්තටම ඔවුනුත් මට දරුවන් වගේ තමයි.
ඔබ බුෂ්රා බිබි සමග විවාහ වෙද්දි විවාහ ගිවිසීමේ වාක්‍යවල ඔබට කියන්න වුණේ බුෂ්රා මනේකා බිබි කියලයි. මනේකා කියන්නේ ඇගේ හිටපු සැමියාගේ වාසගම. එය තවමත් ඇය පාවිච්චි කරනවා.?
විවාහයකින් දික්කසාද වුණා කියලා සැමියාගේ වාසගම ඉවත් වෙන්නේ නැහැ. නැවත වරක් විවාහ වුණොත් එය ඉවත් වෙනවා. දැන් ඇය බුෂ්රා බිබි ඛාන්. ඇය කැමති නම් මනේකා කියලා පාවිච්චි කළත් ප්‍රශ්නයක් නැහැ. මොකද ඇයට ඉන්නවා මනේකා වාසගම තියන දරුවන් පස් දෙනෙක්. ඔවුනුත් සමහර විට කැමති වේවි ඔවුන්ගේ අම්මා තවදුරටත් මනේකා කෙනෙක් වෙනවාට. ඔවුන්ගේ වාසගම පාවිච්චි කරනවාට. ඕවා ප්‍රශ්න කර ගන්න වුවමනා දේවල් නෙවෙයි.
දුලංජලී මුතුවාඩිගේ

ශේෂාද්‍රි මේ දිනවල මොනවද කරන්නේ?
මේ දවස්වල නම් මම නිවාඩු පාඩුවේ ගෙදරට වෙලා ඉන්නවා. මොකද කොරෝනා නිසා පහුගිය කාලේ කලා කටයුතු ඔක්කොම නතර වුණා.හැම වැඩක්ම දින නියමයක් නැතුව කල් ගියා.
මෑතකදී මොනවගේ කලා නිර්මාණවලටද ආරාධනා ලැබුණේ?
අලුතින් චිත්‍රපටයකට ආරාධනා ලැබුණා.ඒකේ රූගතකිරීම් නම් ළඟදීම පටන්ගනීවි.ඒ ඇරුණාම ටෙලිනාට්‍යයකටත් මට කතාකරලා තියෙනවා.හැබැයි තවම ඒක බාරගන්නවාද නැද්ද කියලා මම තීරණය කරලා නැහැ.තව ටිකක් කල්පනා කරලා බලලාම උත්තරයක් දෙනවා කියලයි හිතාගෙන ඉන්නේ.

ඔය අතරේ ශේෂාද්‍රි ව්‍යාපාර කටයුතුවලටත් සම්බන්ධ වෙලා නේද ඉන්නේ?

ඔව්.මම ෆෙස්බුක්,ඉන්ස්ටර්ග්‍රෑම් වගේ සමාජ ජාල හරහා ධබකසබැ ීඑදරු එකක් පවත්වාගෙන යනවා.මම චිත්‍ර ඇදලා,ඒවා ටී ෂර්ට්වල ප්‍රින්ට්කරලා අලෙවි කරනවා.ඒක පටන් අරන් ටිකක් කල්.නමුත් 2013-2014 දී වගේ ඒ ව්‍යාපාරය නැවත්වන්න සිද්ධ වුණා.මගේ පහුගිය උපන් දිනය දවසේ මම ආයෙමත් ඒක පටන්ගත්තා.

කොරෝනා නිසා ලැබුණු නිවාඩුවට කලින් පවා කාලයක් ඔබ කලා කටයුතුවලින් ටිකක් ඈත්වෙලයි හිටියේ.කලාකරුවන් එකතුවෙන විශේෂ අවස්ථාවලදී පවා ,ඔබේ සොහොයුරියන් දෙන්නා පේන්නට හිටියත් ඔබව වැඩිපුර දකින්නට ලැබුණේ නැහැ.ඒවගේම කාලයක් ඔබ මාධ්‍යවලින් පවා ඈත්වෙලා හිටියා.ඇයි එහෙම වුණේ?
ඔය කියන කාරණාව ඇත්ත.එහෙම කරන්න මට සාධාරණ හේතුවක් තිබුණා.කාලයක් මගේ ජීවිතයට නොයෙකුත් ප්‍රශ්න ගැටලු ඇතිවුණා.ඒ සමහර ඒවා මම හිතපුවත් නැති දේවල්.ඒ නිසා තවදුරටත් ප්‍රසිද්ධියේ කතාබහට ලක්වෙන කෙනෙක් වෙන්න මට වුවමනා වුණේ නැහැ.මොකද සමහර අය මං ගැන කිව්වේ හරි දේවල් නෙවෙයි.බොරු ගොත ගොතා වැරදි දේවල්ම තමයි ප්‍රචාරය කළේ.ඔය කියන කාරණා මට මානසිකව දරාගන්න බැරි තත්ත්වයකට ආවා.ඒ හින්දා මම හිතුවා මේ හැමදේකින්ම අයින් වෙලා , කවුරුත් කතා නොකරන තැනකට ගිහින් ඉන්න එක හොඳයි කියලා.ඒක මම හොඳට හිතලා බලා ගත්තු තීරණයක්.

නමුත් ඒ තීරණය නිසා රංගන ශිල්පිනියක් විදියට ඔබට කරන්න තිබුණු ගොඩක් දේවල් මගහැරුණා නේද?
ඔව්.ඔය අතරතුරේ හුඟක් අය මට කිව්වා මේ විදියට කලාව පැත්තෙන් මොනවත් නොකර ඉන්නේ අපරාදෙනේ,තව වයස ගතවෙන්න කලින් මගේ තියන හැකියාවෙන් ප්‍රයෝජන ගන්න කියලා.ඒත් මම ඒ තීරණය ගන්න්න මගේ හැමදෙයක්ම යථා තත්ත්වයට පත්වෙනතුරු කල්ගත්තා.දැන් මම තීරණය කරලයි තියෙන්නේ,ඉස්සර වගේම ආයෙමත් හොඳ නිර්මාණවලට දායක වෙමින් දිගු ගමනක් යනවා කියලා.

ඒ කියන්නේ කලින් තිබුණු ගැටලු සියල්ල දැන් විසඳිලාද තියෙන්නේ?
අපොයි ඔව්.ඒ ඔක්කොම දැන් ඉවරයි. ඒ කාලය තුළ මගේ හැමදෙයක්ම මම හදාගත්තා. මම දැන් මානසිකවත් ඉස්සරට වඩා ගොඩක් ශක්තිමත්.ඒ විතරක් නෙවෙයි , ඒ කාලය තුළ මම නිකම් හිටියෙත් නැහැ.මගේ අධ්‍යාපන කටයුතු මම අවසන් කළා.පූර්ව ළමාවිය සංවර්ධනය ගැන තමයි මම ඉගෙන ගත්තේ.ඒ සම්බන්ධව උපාධියකුත් සම්පූර්ණ කරපු නිසා මම දැන් ගුරුවරියක් විදියට කටයුතු කරනවා. දැනට මම පුද්ගලික අධ්‍යාපන ආයතනයක සේවය කරනවා.


ගැටලු සේරම විසඳුනාට පස්සේ දැන් ශේෂාද්‍රිගේ පුද්ගලික ජීවිතයේත් ලොකු වෙනසක් සිද්ධ වෙලා.ඒ වෙනස ඇතිකරපු ඔබේ පෙම්වතා ගැන හා හා පුරා කියලා රැජිනිය පාඨකයන්ට කියමු නේද?
එයාගේ නම ක්‍රිෂාන් පෙරේරා.සංගීතඥයෙක් විදියට තමයි ගොඩක් අය එයාව හඳුනන්නේ.

ශේෂාද්‍රිගේ ජීවිතයට ඔහු සමීප වුණේ කොහොමද?
ක්‍රිෂාන් මගේ අක්කා දිනක්ෂිගේ හොඳම යාළුවෙක්.ඒ වගේම එයා අපේ පවුලේ හිතවතෙක්.අවුරුදු දහයක පහළොවක විතර ඉඳන් මම ක්‍රිෂාන්ව අඳුරනවා.එයා නිතර අපේ ගෙදරත් එනවා.ඒත් කවදාවත් මට එයා ගැන විශේෂ හැඟීමක් තිබිලා නෑ.එයාටත් මං ගැන එහෙම තිබිලා නෑ.මගේ අක්කා තමයි අපි දෙන්නාව එකතුකරන්න මැදිහත් වුණේ.අක්කා කිව්වා ක්‍රිෂාන් එක්ක ටිකක් කතා කරලා බලන්න කියලා.ක්‍රිෂාන්ටත් අක්කා ඒ ගැන කියලා තිබුණා.එහෙම තමයි අපි දෙන්නාගේ සම්බන්ධය ඇතිවුණේ.

ඔබේ දෙමවුපියෝ මේ ගැන මොකද කිව්වේ?
තමන්ගේ දරුවෝ කවදාහරි විවාහවෙලා හොඳ පවුල් ජීවිතයක් ගතකරනවා දකින එකයි දෙපවුපියන්ගේ ආසාව.මගේ අම්මාටයි තාත්තාටයිත් ඒ ආසාව තියෙනවා.ඒ අය ගොඩක් ලක් ඉඳලා ක්‍රිෂාන්ව අඳුරනවා.ඒ වගේම ඒ අය ක්‍රිෂාන්ට හුඟක් කැමතියි.ඒ හිබ්දා දෙමාපියන්ගේ අවසරයත් ඇතුව තමයි අපි මේ සම්බන්ධය පටන්ගත්තේ.
ක්‍රිෂාන් කලාවට සම්බන්ධ කෙනෙක්වීමත් මේ සම්බන්ධයට බලපාන්න ඇති නේද?
ඔව්.අපේ පවුලමත් කලාවට ලැදි නිසා ඒ අවබෝධයත් අපි අතරේ තියනවා.හැබැයි ක්‍රිෂාන් පැය අටේ රැකියාවකුත් කරන කෙනෙක්.ඒ වැඩ රාජකාරි ඉවරවෙලා තමයි එයා සංගීත කටයුතුවල යෙදෙන්නේ.ඒ හින්දා එයා ගොඩක් වෙලාවට කාර්යබහුලයි.ඒ හින්දා අපේ ගෙදර සමහර වෙලාවට විශෙෂ සාද වගේ දේවල් තියන අවස්තාවලදී පවා එයාට ඒවා මගහැරෙනවා.නමුත්,මම වගේම මගේ පවුලේ හැමෝමත් එයාගේ කාර්යබහුල බව ගැන අවබෝධයක් තියෙන නිසා ගැටලු මතුවෙන්නේ නැහැ.

ඔබේ අක්කා දිනක්ශි සහ ජනප්‍රිය නළු සාරංග දිසාසේකර අතර තියෙන ප්‍රේම සම්බන්ධයත් ගැන දැන් බොහෝදෙනාට රහසක් නෙවෙයි.ඔබ අක්කාට කලින් විවාහ වේවිද නැත්නම් අක්කාගේ විවාහය මුලින් සිද්ධවේවිද?
ඒ දෙන්නා තවම විවාහවෙන දවසක් ගැන හරියට සැලසුම් කරලා නැහැ.අක්කා දන් ආයෙමත් කාර්යබහුල වෙලයි ඉන්නේ.මමත් තවම තීරණය කරලා නැහැ කවදා වගේ විවාහ වෙනවද කියලා.ඒ නිසා අක්කා කලින් විවාහවේවිද මම ඉස්සර වේවිද කියලා තවම නම් හරියට කියන්න බැහැ.කවූරු ඉස්සරවිණත් මුලින්ම ඒ ගැන ”රැජිනිය”ට කියන්නම්.

ඔබ ක්‍රිෂාන් එක්ක එකතුවෙලා ළඟදීම කරන්න යන අලුත් වැඬේ ගැනත් කතා නොකළොත් අඩුවක් නේද?
මම මියුසික් වීඩියෝවල පෙනී ඉන්නේ නෑ කියන තීරණයේ තමයි මෙච්චර කාලයක් හිටියේ.උසස් පෙළ කරන කාලේ විතරක් එක මියුසික් වීඩියෝවකට දායක වුණා.ඒත් අවුරුදු දහයකට විතර පස්සේ ඒ තීරණය වෙනස් කරලා,ක්‍රිෂාන් ගයපු අලුත්ම ගීතයක මියුසික් වීඩියෝවේ පෙනීසිටියා.ක්‍රිෂාන් දනගෙන හිටියා මම මියුසික් වීඩියෝවල ඉන්න ඒතරම් කැමැත්තක් තිබුණේ නැති බව.ඒ හින්දා ඒ විෂුවල් එකට ගන්න කෙනෙක් ටික කාලයක් තිස්සේ හොයද්දී තමයි මම කිව්වේ , එහෙනම් මම ඒක කරන්නම් කිවලා.එයත් ඒකට කැමති වුණා.දැන් ඒ මියුසික් වීඩියෝවේ වැඩකටයුතු ගොඩක්ම දුරට ඉවරයි.තව සතියකින් විතර ඒක එළිදක්වන්නයි අපි හිතාගෙන ඉන්නේ.

කිෂාන් කනංකෙ

පාසල් සිසුවියකව සිටියදී ගෙදරින් පැන ගොස් එක් සතියක් තුළ පිරිමින් ගණනාවක් සමග ලිංගිකව හැසිරුණු යුවතියක් ගැන කලකට ඉහතදී අසන්නට ලැබිණි. ඇය පෙම්වතුන් කිහිප දෙනෙකු සමග එම සතිය තුළ ලිංගිකව හැසිරීමට ද එයින් එක් පෙම්වතෙක් ඔහුගේ මිතුරන් සමගද සිටින ලෙස ඇගෙන් ඉල්ලා තිබේ. එවිට ඇය තමන්ට මුදල් දෙන්නේ නම් කැමති විය හැකි බව පවසා ඇත. ඒ අනුව එක් මිතුරකුගෙන් රුපියල් දහස බැගින් ගනිමින් ඇය සිරුර විකුණා ඇත.
අප මෙහිදී කතා කරන්නේ මේ යුවතිය පිළිබඳව නොවේ.

අප මේ ලිපිය මගින් විමසන්නට උත්සාහ දරන්නේ නව යොවුන් වයසේ අයකු අධික ලිංගික ආශාවලින් යුක්තවීම හා ඒවා පාලනය කර ගැනීමට නොහැකි වීම සම්බන්ධයෙන් බලපාන කායික හා විශේෂයෙන් මනෝ වෛද්‍ය විද්‍යාත්මක කරුණු පිළිබඳවය.

වයස අවුරුදු පහළොව යනු හෝමෝනවල අධික ක්‍රියාකාරීත්වය තුළින් ලොකු පිබිදීමක් ඇති වන කාලවකවානුවක් සහ ද්විතියික ලිංගික ලක්ෂණ පහළ වන වයස් සීමාවයි. නමුත් එසේ වූ පලියට මනුෂ්‍යයන් වශයෙන් අප අපගේ එම හැඟීම් අවශ්‍ය විටෙක මිස ඕනෑම විටෙක එළි දක්වන්නේ නැත. ලිංගිකත්වය පිළිබඳ හැඟීම යටපත් කර ගෙන හිඳීම මනුෂ්‍ය ස්වභාවයයි.

අධික ලිංගික හැසිරීම් සඳහා බලපාන කායික හේතුවක්

මෙවැනි අධික ලිංගික හැසිරීම් මේ වයසේ දරුවකු තුළි පළ වන විට මුලින්ම සොයා බැලිය යුත්තේ ඊට බලපාන කිසියම් කායික හේතුවක් තිබේද යන්නය. අධික හෝමෝන ක්‍රියාකාරිත්වයක් ඇති විට මේ ආකාරයෙන් අසාමාන්‍ය අන්දමට අනුරාගී හැසිරීම් පළ කිරීමට පුළුවන. ඒ අනුව මුලින්ම එවැනි දරුවකු යොමු කළ යුත්තේ අන්තරාසර්ග ග්‍රන්ථි විශේෂඥ

( Endocrinologist)  වෛද්‍යවරයකුටය. අපේ ලිංගික හෝමෝන ශ්‍රාවය වන්නේ පිටියුටරි ග්‍රන්ථිය ආශ්‍රිත ප්‍රදේශයෙනි. ඒ අනුව පිටියුටරි ග්‍රන්ථියේ පිළිකාවක් වැනි ගෙඩියක් හට ගත් විටද එම ග්‍රන්ථියෙන් වැඩිපුර හෝමෝන ශ්‍රාවය වේ. ඒ හේතුව නිසාද අසාමාන්‍ය අන්දමින් ලිංගික ආශාව ඇති වී ඒ සම්බන්ධ හැසිරීම්ද පළ කළ හැකිය. ඒ අනුව හෝමෝන පරීක්ෂණයක් (Hormone Profile Test) කර බැලීම තුළින් මේ කුමන තත්ත්වයක් හෝ පවතින්නේද නැද්ද යන්න හඳුනා ගත හැකිය.
නමුත් එබඳු කායික දෝෂ තත්ත්වයක් නැත්නම් ඊළඟට යොමු කළ යුත්තේ මනෝ වෛද්‍ය විශේෂඥවරයකු වෙතටය.

අධික ලෙස ලිංගික හැසිරීම්වලට රුචි වීම ලෝක සෞඛ්‍ය සංවිධානයේ මානසික රෝග පිළිබඳ වර්ගීකරණයෙහි (ICD 10) හඳුන්වන පොදු නාමය වන්නේ  Excessive Sexual Desire ලෙසිනි. පොදු නාමය මෙය වුවත් කාන්තාවන්ට අධික ලෙස ලිංගික ආශාව හා හැසිරීම පැවැතීම නිම්ෆොමේනියා (Nymphomania) ලෙසිනුත් පිරිමින් තුළ අධික ලිංගික ආශාව හා හැසිරීම පැවැතීම සැටරයිසිස් (Satyrisis) ලෙසිනුත් වැඩිදුරටත් දක්වා ඇත.
ඇමෙරිකානු මනෝ වෛද්‍ය විද්‍යා සංගමයේ රෝග නිර්ණායක සංග්‍රහයෙහි (DSM 4) අධික ලිංගික ආශාව සහ හැසිරීම් මානසික ආබාධයක් ලෙස දක්වා ඇති අතර එය ඔවුන් පොදුවේ Hyper Sexual Disorder ලෙස දක්වා තිබේ.

අධික ලිංගික හැසිරීම් දක්නට ලැබෙන මානසික හේතු
මේනියා රෝගය
මනෝ වෛද්‍ය විද්‍යාවේ ද්වී ද්‍රවීය ආබාධය (Bipolar disorder) නමින් මානසික ආබාධයක් තිබේ. මේ රෝගයද 1 සහ 2 නමින් කොටස් දෙකකි. ද්වි ද්‍රවීය යනු අන්ත දෙකක් පැවැතීමය.
ඒ අනුව ද්වී ද්‍රවීය ආබාධය 1 රෝගයේ අන්ත දෙක වනුයේ විශාදය (Depression) සහ මේනියා (Mania) රෝගයයි. ද්වි ද්‍රවීය ආබාධය 2 හි අන්ත දෙක නම් විශාදය සහ හයිපෝමේනියා තත්ත්වයයි.
ද්වී ද්‍රවීය ආබාධයට අන්ත දෙකක් පැවැතීම මත මේ මානසික රෝගය වැළඳුණු කෙනකු සමහර කාලවලට දක්වන්නේ විශාද රෝග ලක්ෂණය. තවත් සමහර කාලවලට මේනියා ලක්ෂණ දක්වති. ද්වී ද්‍රවීය ආබාධය 2 හිඅන්ත දෙක විශාදය සහ හයිපොමෙනියා බව ඉහත දැක්වීමු. මෙහිදී රෝගියා විශාද ලක්ෂණ පළ කරන කාලයට නිතර දුකින්, තරහින් සහ නොසන්සුන් බවින් පිරී දුක්මුසුව පැත්තකට වී කාලය ගත කරයි. ලිංගික හැසිරීම් පිළිබඳ උනන්දුවක් හෝ ආශාවක් නැත. හයිපොමේනියා තත්ත්වයේදී දක්වන්නේ එහි අනෙක් පැත්තය. එනම් සතුට අධිකය. ලිංගික හැසිරීම් කෙරෙහි දැඩි කැමැත්තක් දක්වයි නමුත් එය පානය කරගැනීමේ හැකියාව ඇත. හයිපොමේනියා රෝගය රෝහලක නතර කර ප්‍රතිකාර ගත යුතු තත්ත්වයක් නොවේ. ඔවුනට සාමාන්‍ය ජීවිතයක් ගත කළ හැකිය. මෙය මේනියා තරමටම වර්ධනය නොවූ තත්ත්වයකි.
අපේ සමාජය තුළ ඕනෑ තරම් මෙම රෝගීන් දැක ගත හැකිය. ඔවුනට ප්‍රතිකාර අවශ්‍ය නැත.
ලිංගික හැසිරීම් අධික ලෙස පළ කරන්නට වීම රෝගියාටම කරදරයක් වුණොත් පමණක් ඖෂධ ප්‍රතිකාර ලබා ගත හැකිය. අප ද්වී ද්‍රවීය ආබාධය 2 ගැන සුළුවෙන් සඳහන් කළේ ඔබට මේ තත්ත්වය නිරවුල් ලෙස පැහැදිලි කර ගැනීම සඳහාය.
ද්වී ද්‍රවීය ආබාධය යනු මීට වඩා ප්‍රබල රෝග තත්ත්වයකි. ඉහත සඳහන් කළ යුවතියගේ බඳු හැසිරීම් ද්වී ද්‍රවීය පළවෙනි කාණ්ඩය සහිත රෝගීන් පළ කළ හැකිය. මේ රෝගයේ එක් අන්තයක් වනුයේ මේනියා තත්ත්වයයි. සාමාන්‍යයෙන් මේනියා රෝගය තනි රෝගයක් ලෙස වැළඳෙන්නේ නැත. එය ද්වි ද්‍රවීය ආබාධයේ එක් අන්තයක් ලෙස පවතියි.
ද්වි ද්‍රවීය රෝගීන්ට මේනියා තත්ත්වය ඇති කාලවලදී විශේෂයෙන් කාන්තාවන් අධික ලිංගික ආශාවන් හා හැසිරීම් පළ කරනු ඇත. සාමාන්‍ය කෙනෙකුට තමන් තුළ ඇතිවන අධික ලිංගික ආශාවන් අවස්ථානුකූලව පාලනය කරගත හැකි මුත් මේනියා
රෝගීන්ට එලෙස පාලනය කර ගැනීම අසීරුය. ඕනෑම කෙනෙකු ඉදිරියේ කිසිදු ලජ්ජාවක් බියක් නැතිව සිය ඇඳුම් ඉවත් කර ලිංගික හැසිරීමක යෙදීම මේ රෝග තත්ත්වය ඇති කාන්තාවන්ට කිසි අපහසුවක් නැත. අප මේ දක්වන්නේ ගණිකා වෘත්තිය පිළිබඳව නොවන බව සැලකිය යුතුය. ඕනෑම තැනක, ඕනෑම විටෙක කිසිදු අපහසුවකින් තොරව තම නිරුවත දැක්වීමට හා ඕනෑම අයකු හා කිසිදු පැකිලීමකින් තොරව කායික සම්බන්ධතා පැවැත්වීමට මොවුන් පෙළඹෙනු ඇත. ඊට හේතුව මේනියා රෝග තත්ත්වය හේතුවෙන් ලිංගික ආශාවන් පාලනය කර ගැනීමට හැකියාවක් නොතිබීමය. නමුත් මෙහිදී විශේෂයෙන් කිව යුත්තක් නම් අධික ලිංගික ආශාව හා හැසිරීම් ඇති හැම කෙනෙක්ම මේනියා රෝගීන් නොවන බවය.

ඇබ්බැහිවීම
මෙකල නව යොවුන් දරුවන් විවිධාකාර දේවල්වලට ඇබ්බැහිවීම දක්නට ලැබේ. සමහරුන් සිතා සිටින්නේ පිරිමි දරුවන් මිස ගැහැනු දරුවන් විවිධ දේවල්වලට ඇබ්බැහි නොවන බවය. නමුත් ගැහැනු පිරිමි භේදයක් නැතිවම නොයෙකුත් දේවල්වලට ඇබ්බැහි වීම සිදුවිය හැකි අතර විශේෂයෙන් ඉහළ සමාජයේ සහ ඉහළ පෙළේ පාසල්වල ඇතැම් දරුවන් අතර පවා මත් පෙති වර්ග ජනප්‍රිය වී තිබේ. ෆාමසිවල දක්නට නොලැබෙන මේවා අලෙවිය නීති විරෝධී වුවත් මෙවැනි දෑ මිලදී ගත හැකි ස්ථාන පවතියි. මේවායින් ශරීරය තුළ උත්තේජනයක් ඇති කරන අතර ලිංගික ආශාවද බොහෝ සෙයින් ඉහළ නැංවෙනු ඇත. මේවා දිගින් දිගටම ගන්නා අයගේ ලිංගික ප්‍රබෝධය හා ආශාව වැඩිකලක් රඳා පවතින නිසා ඔවුන් කිසිදු ලජ්ජාවකින් හෝ බියකින් තොරව අධික ලෙස ලිංගික සේවනයෙහි යෙදෙනු ඇත.

මහනුවර මහ රෝහලේ
විශේෂඥ මනෝ වෛද්‍ය
ගිහාන් අබේවර්ධන

ඉන්දු පෙරේරා